වැලිගම ප්රදේශයේ භෞතචිකිත්සකවරියගේ මරණය සම්බන්ධයෙන් ප්රධාන සැකකරු අත්අඩංගුවට ගැනීම සඳහා පරීක්ෂණ කණ්ඩායම් හතරක් යොදවා ඇති බව පොලිසිය පවසයි.
පසුගිය 17 වන දින තෙල්දෙණිය රෝහල අසල මෝටර් රථයක් තුළ මෙම භෞතචිකිත්සකවරියගේ මළ සිරුර සොයා ගනු ලැබුවා.
අපරාධයට සම්බන්ධ බව කියන සැකකරු දූෂණ හා වංචා නඩු 20 කට වැඩි ගණනක චෝදනා ලැබූ සැකකරුවෙකු බවට තොරතුරු අනාවරණය වී ඇති බව පොලිසිය පවසනඅතර, ඉන් කිහිපයක් දැනට අධිකරණයේ විභාග වෙමින් පවතින බවයි වාර්තා වන්නේ.
සැකකරු කුරුණෑගල නාරම්මල ප්රදේශයේ පදිංචිකරුවෙක්.
පොලිසිය ඔහුගේ පවුලේ සාමාජිකයන්ගෙන් ප්රකාශ සටහන් කරගෙන තිබෙනවා.
ඔහු කාන්තාවන් කිහිප දෙනෙකු සමඟ සමීප සබඳතා පැවැත්වූ බවත්, මෘදුකාංග ඉංජිනේරුවෙකු ලෙස පෙනී සිටිමින් ව්යාජ ජාතික හැඳුනුම්පතක් භාවිත කළ බවටත් විමර්ශනවලින් හෙළි වී තිබෙනවා.
ඔහු දැනට සැඟවී සිටින දරුවන් තිදෙනෙකුගේ මවක් සමඟ ද සම්බන්ධතාවයක් පවත්වා ඇති බවට ද වාර්තා වනවා.
මළ සිරුර සොයාගත් මෝටර් රථය සැකකරු සමඟ සම්බන්ධතාවයක් පැවැත්වූ කාන්තාවකට අයත් බව පොලිසිය පවනවා.
පශ්චාත් මරණ පරීක්ෂණයෙන් පසු මියගිය කාන්තාවගේ දේහය ඇගේ පවුලේ අයට භාර දුන් අතර, එමඟින් මරණයට හේතුව පිළිබඳ විවෘත තීන්දුවක් ලබා දෙනු ලැබුවා.
මියගිය කාන්තාව අම්පාර රෝහලේ සේවය කළ වැලිගම පදිංචි 33 හැවිරිදි භෞතචිකිත්සකවරියක් වන අතර, ඇය ජුනි 03 වන දින සිට 16 වන දින දක්වා නුවරඑළිය ප්රදේශයේ සංචාරයක නිරත වී සිටි බවයි හෙළිව ඇත්තේ.
