ලොව ප්රමුඛතම තාක්ෂණික සමාගමක් වන මයික්රොසොෆ්ට් (Microsoft) සමාගම ඉන්දියාව තුළ ස්ථාපිත කරන ඔවුන්ගේ විශාලතම දත්ත මධ්යස්ථානය (Data Center) සැලසුම් කළ පරිදි 2026 වසරේ මැද භාගය වන විට සක්රීය කිරීමට සූදානම් වන බව එම සමාගමේ විධායක නිලධාරියෙක් රොයිටර් පුවත් සේවයට ප්රකාශ කර ඇත.
කෘතිම බුද්ධි (AI) සේවා සඳහා ලෝකයේ විශාලතම වෙළෙඳපොළක් වන ඉන්දියාව තුළ තම ස්ථාවරය ශක්තිමත් කරගැනීම වෙනුවෙන් මයික්රොසොෆ්ට් සමාගම විශාල වශයෙන් ආයෝජනය කරමින් සිටී.
මයික්රොසොෆ්ට් ඉන්දු සහ දකුණු ආසියානු කලාපීය සභාපති පුනීත් චන්ඩොක් (Puneet Chandok) මහතා සඳහන් කළේ ඉන්දියාව තුළ ‘Azure’ Cloud සේවා සහ මසකට ඩොලර් 30ක් වන ‘Copilot 365’ AI සහායකයා සඳහා පවතින්නේ අතිමහත් ඉල්ලුමක් බවයි.
මේ හේතුවෙන් මයික්රොසොෆ්ට් සමාගම ඉන්දියාව වෙනුවෙන් ඩොලර් බිලියන 17.5ක දැවැන්ත ආයෝජනයක් ප්රකාශයට පත් කර ඇති අතර, දකුණු ඉන්දියාවේ ප්රධාන තාක්ෂණික කේන්ද්රස්ථානයක් වන හයිද්රාබාද් (Hyderabad) නගරයේ මෙම නව දත්ත මධ්යස්ථානය ඉදි කෙරේ.
ඉන්දියාව සතු බිලියනයකට අධික අන්තර්ජාල පරිශීලකයින් සංඛ්යාව සහ දක්ෂ තොරතුරු තාක්ෂණ ශ්රම බලකාය නිසා ගූගල් (Alphabet) සහ ඇමසන් (Amazon) වැනි තරඟකාරී සමාගම්ද ඉන්දියාව දෙස දැඩි අවධානයක් යොමු කර ඇත.
ඉන්ෆොසිස් (Infosys), කොග්නිසන්ට් (Cognizant) සහ ටාටා (TCS) වැනි ඉන්දීය තොරතුරු තාක්ෂණ දැවැන්තයින් දැනටමත් මයික්රොසොෆ්ට් Copilot බලපත්ර 50,000කට අධික ප්රමාණයක් බැගින් භාවිත කරමින් සිටින බැවින්, මෙම නව දත්ත මධ්යස්ථානය හරහා එම වර්ධනය වන පාරිභෝගික පදනමට වඩාත් කාර්යක්ෂම සේවාවක් සැපයීමට මයික්රොසොෆ්ට් සමාගම බලාපොරොත්තු වේ.
