ඉන්ටපෝල් එකේ දේශනයක් පවත්වන්න පොලිස් මාධ්‍ය ප්‍රකාශකවරයා ප්‍රංශයට යයි

පොලිස් මාධ්‍ය ප්‍රකාශක සහකාර පොලිස් අධිකාරී ෆ්‍රෙඩ්රික් වුට්ලර් හට INTERPOL විසින් සංවිධානය කරන 1 වන ගෝලීය මහජන සන්නිවේදන සම්මේලනයට සහභාගිවීමට නිල වශයෙන් ආරාධනා කළ බව ශ්‍රී ලංකා පොලිසිය වෙත දැනුම් දී තිබෙනවා.

මෙම සම්මේලනය 2026 අප්‍රේල් 28 සිට 30 දක්වා ප්‍රංශයේ ලියෝන් නගරයේ පැවැත්වීමට නියමිත අතර,INTERPOL මහජන සන්නිවේදන අධ්‍යක්ෂ මණ්ඩලය (COM) විසින් ලබාදුන් මෙම ආරාධනය ශ්‍රී ලංකා පොලිසිය විසින් ක්‍රියාත්මක කර ඇති අර්බුද කළමනාකරණ ක්‍රම වේදයන්හි සක්‍රීය භාවය පිළිබඳ පිළිගැනීමක් ලෙස සැලකෙනවා.

පොලිස් මාධ්‍ය ප්‍රකාශක සහකාර පොලිස් අධිකාරී ෆ්‍රෙඩ්රික් වුට්ලර් විසින් ශ්‍රී ලංකා පොලිසියේ අර්බුද සන්නිවේදන ක්‍රමවේදය ක්‍රියාත්මක කළ ආකාරය සහ එහි කාර්යක්ෂමතාව පිළිබඳ බහු මාධ්‍ය ප්‍රක්ෂේපණ මඟින් ඉදිරිපත් කිරීමක් සිදු කිරීමට නියමිත අතර, එහිදී 2025 නොවැම්බර් මාසයේ සිදු වූ ” දිව්වා ආපදා ‘” සමයේ ශ්‍රී ලංකා පොලිසියේ ක්‍රියාකාරී දායකත්වය විශේෂයෙන් අවධානයට ලක් කිරීමට නියමිතයි.

මෙම ආරාධනය, පොලිස් මාධ්‍ය ප්‍රකාශක සහකාර පොලිස් අධිකාරී ෆ්‍රෙඩ්රික් වුට්ලර් විසින් ජාත්‍යන්තර නීති ක්‍රියාත්මක කිරීමේ සහයෝගිතාව සඳහා කරන ලද අඛණ්ඩ දායකත්වය පිළිබඳ ඇගයීමක් වන අතර, INTERPOL VANGUARD B ව්‍යාපෘතියට ඔහුගේ සාර්ථක සහභාගීත්වයෙන් පසු ලැබූ ගෞරවයක් ලෙසද සැලකෙනවා.

පොලිස් මාධ්‍ය ප්‍රකාශක සහකාර පොලිස් අධිකාරී ෆ්‍රෙඩ්රික් වුට්ලර් සම්මේලනයට සහභාගි වන කාලය තුල පොලිස් අධිකාරී (SP) මිනුර සෙනරත් රාජකාරි ආවරණය කරනු ලබනවා.