මාවනැල්ල පොලිස් වසමේ රඹුක්කන – මාවනැල්ල මාර්ගයේ තලගොල්ල පාලම ආසන්නයේ තිබූ ගසක් මාර්ගයේ ගමන් කරමින් තිබූ ත්රීරෝද රථයක් මතට විශාල ගසක් කඩා වැටී ඊයේ (23) රාත්රී කාලයේ අනතුරක් සිදුව තිබුණා.
එම අවස්ථාවේ දී කඩිනමින් ක්රියාත්මක වූ පොලිස් නිලධාරීන්, හමුදාව සහ ප්රදේශවාසීන්ගේ ද සහාය ඇතිව ගසට යට වී තිබූ ත්රීරෝද රථයේ සිටි පිරිමි පුද්ගලයින් දෙදෙනෙකු, කාන්තාවක් සහ කුඩා දරුවෙකු මුදවා ගෙන මාවනැල්ල රෝහල වෙත ඇතුළත් කිරීමේදී ත්රීරෝද රථයේ රියදුරු මියගොස් තිබෙනවා.
මෙලෙස මියගිය පුද්ගලයා වයස අවුරුදු 38ක මාවනැල්ල ප්රදේශයේ පදිංචිකරුවෙක්.
රෝහල් ගතකළ අනෙක් තිදෙනාගේ තත්ත්වය බරපතළ බවයි වාර්තා වන්නේ.
මෙම ගස කඩා වැටීම හේතුවෙන් රඹුක්කන මාවනැල්ල මාර්ගයේ වාහන ගමනාගමනය තලගොල්ල පාලම අසලින් සම්පූර්ණයෙන්ම අවහිර වී ඇති බවයි පොලිසිය සඳහන් කළේ.
ගස ඉවත් කිරීමේ කටයුතු මේ වන විට සිදුකෙරෙමින් පවතිනවා.
රථවාහන ගමනාගමනය යථා තත්ත්වයට පත් කරන තෙක් එම මාර්ගය හරහා ගමන් ගන්නා සියළුම රියදුරන් හා මහජනතාව විකල්ප මාර්ග භාවිත කරන ලෙසට පොලිසිය මහජනතාවගෙන් ඉල්ලා සිටිනවා.
මාවනැල්ල පොලිසිය වැඩිදුර විමර්ශන සිදු කරනු ලබනවා.
