සංචාරක බංග්ලාදේශ කණ්ඩායමට ශ්‍රී ලංකාව ඔවුන්ගේ මව්බිමේ දී පරාජයට පත් කරමින් එක්දින තරගාවලි ජයක් ලැබීමට අද (08) පැවැත්වෙන තුන්වැනි හා අවසන් එක්දින තරගයේ දී ලකුණු 286ක ඉලක්කයක් හිමිවුණා.
අද තරගය පල්ලෙකැලේ ජාත්‍යන්තර ක්‍රීඩාංගණයේ දී ආරම්භ වූයේ කාසියේ වාසිය ශ්‍රී ලංකාවට හිමිකර දෙමින්.
ඒ අනුව පළමු ව පිතිකරණය තෝරාගත් ශ්‍රී ලංකා කණ්ඩායම පන්දුවාර 50 අවසානයේ දී කඩුලු 07ක් දැවී ලකුණු 285ක් ලබා ගත්තා.
ආරම්භක පිතිකරු පැතුම් නිස්සංක ලකුණු 35ක් ලබාගත් අතර නිශාන් මධුෂ්ක එක් ලකුණකට දැවී ගියා.
කමිඳු මෙන්ඩිස් ලකුණු 16යි.
ශ්‍රී ලංකාවේ විශ්වාසය තැබිය හැකි පිතිකරුවන් තිදෙනෙකු එලෙස අඩු ලකුණකට දැවී යද්දී කුසල් මෙන්ඩිස් සිය නායකයා වූ චරිත් අසලංක සමග එක් වී සිව්වැනි කඩුල්ලට ලකුණු 124ක සබඳතාවක් ගොඩනැගුවා.
එම සබඳතාව බිඳ වැටුණේ සිය 16 වැනි එක්දින අර්ධ ශතකය ලබා සිටි චරිත් අසලංක ටස්කින් අහමඩ්ගේ පන්දුවක් හමුවේ ලකුණු 58කට දැවී යාමත් සමගයි.
කෙසේවෙතත් ශ්‍රී ලංකා ලකුණු පුවරුව වෙනුවෙන් විශිෂ්ට පිතිකරණයක නිරත වූ කුසල් මෙන්ඩිස් සිය එක්දින දිවියේ 06 වැනි ශතකය වාර්තා කළ අතර ඔහු ශම්මිම් හුසේන්ගේ පන්දුවක් හමුවේ දැවී යන විට පන්දු 114කට හතරේ පහර 18ක් සමගින් ලකුණු 124ක් ලබාගෙන සිටියා.
වනිඳු හසරංග නොදැවී ලකුණු 18ක් සහ දුෂ්මන්ත චමීර නොදැවී ලකුණු 10ක් ලබා ගැනීම ද ශ්‍රී ලංකා ලකුණු පුවරුව ශක්තිමත් කිරීමට මහෝපකාරී වුණා.
කඩුලු බිඳ දැමීමේ දී මෙහිඩි හසන් හා ටස්කින් අහමඩ් කඩුලු දෙක බැගින් බිඳ දැමුවා.
එක් කඩුල්ල බැගින් හිමිවූයේ ටන්සිම් හසන්, ටන්වීර් ඉස්ලාම් හා ශමීම් හුසේන් හටයි.
තරග තුනකින් සමන්විත එක්දින තරගාවලියේ දී දෙරට ම තරග 1-1ක් බැගින් ජයගෙන සම මට්ටමේ පසුවනවා.
එබැවින් තරගාවලි ශූරතාවක් වෙනුවෙන් අද තරගයේ ජය දෙපිළටම තීරණාත්මක වනු ඇති.
