ජම්මු – කාශ්මීරයේ පහල්ගම් ප්රදේශයේ සිදු වූ දරුණුතම ත්රස්තවාදී ප්රහාරයේ වගකීම පාකිස්තානය කේන්ද්ර කරගනිමින් ක්රියාත්මක ලෂ්කර්-ඊ-තායිබා (LeT) ත්රස්ත කණ්ඩායම භාරගෙන තිබෙනවා.
NDTV මාධ්ය වාර්තා කළේ එම ත්රස්ත සංවිධානය සමාජ මාධ්ය පණිවිඩයක් තබමින් ඒ බව ප්රකාශ කර ඇති බවයි.
දකුණු ජම්මු සහ කාශ්මීරයේ සංචාරකයින් පිරිසකට පෙරේදා (22) මෙම ත්රස්ත ප්රහාරය එල්ල වුණා.
ඉන් අවම වශයෙන් පුද්ගලයින් 26 දෙනෙකු මියගිය අතර නාවික හමුදා සහ බුද්ධි අංශ නිලධාරීන් ද මරණකරුවන් අතර සිටින බවයි වාර්තා වූයේ.
මෙම ප්රහාරයෙන් තවත් පිරිසක් තුවාල ලැබුවා.
ඉන්දීය මාධ්ය වාර්තා කළේ දශක දෙකකට ආසන්න කාලයක දී රටේ සිදු වූ දරුණුතම ත්රස්ත ප්රහාරය මෙය බවයි.
පහල්ගම් දිස්ත්රික්කයේ දර්ශනීය හිමාලයානු කලාපයේ ජනප්රිය සංචාරක ගමනාන්තයක් ලෙස වෙඩි ප්රහාරය සිදු වූ ස්ථානය පිළිගැනෙනවා.
මියගිය අය අතර ඉන්දියානුවන් 25 දෙනෙකු සහ නේපාල ජාතිකයෙකු ඇතුළත් බවත් හෙළි ව තිබෙනවා.
2008 මුම්බායි වෙඩි තැබීමෙන් පසු ඉන්දියාවේ සිවිල් වැසියන්ට එල්ල වූ දරුණුතම ප්රහාරය මෙය වූ අතර මුම්බායි ප්රහාරයෙන් ද 160කට වැඩි පිරිසක් මියගියා.
සෞදි අරාබි සංචාරය ඉතා ඉක්මනින් අවසන් කර, ඊයේ (23) උදෑසන ඉන්දියාවට පැමිණි අගමැති නරේන්ද්ර මෝදි, “මෙම නින්දිත ක්රියාව පිටුපස සිටින අය නීතිය හමුවට පමුණුවන බවත් ඔවුන්ට කිසිදු නිදහසක් නොලැබෙන බවත්”ප්රකාශ කළා.
