පාස්කු ප්‍රහාරයට අදාළව වන්දි මුදල් ගෙවීමට නියම වී සිටි සියලුම වගඋත්තරකරුවන් එම වන්දි මුදල් ගෙවා අවසන් කර ඇති බව අද (07) ශ්‍රේෂ්ඨාධිකරණයට දැනුම් දී තිබෙනවා.
ඒ, අනුව එම සියලුම වග උත්තරකරුවන් අදාළ නඩු කටයුත්තෙන් මුදාහැරීමට ශ්‍රේෂ්ඨාධිකරණයට නියෝග කරනු ලැබුවා.
කෙසේ වෙතත් මෙම වග උත්තරකරුවන් ගෙවා ඇති වන්දි මුදල් කුමන ආකාරයෙන් වියදම් කරන්නේ ද යන්න පිළිබඳව කරුණු සනාථ කිරීම සඳහා මෙම නඩුව යළි නොවැම්බර් 18 වනදා කැඳවීමටයි ශ්‍රේෂ්ඨාධිකරණය නියෝග කළේ.
ප්‍රමාණවත් බුද්ධි තොරතුරු ලැබී තිබියදීත් පාස්කු ප්‍රහාර මාලාව වළක්වා ගැනීමට කටයුතු නොකිරීම හේතුවෙන් හිටපු ජනාධිපති මෛත්‍රීපාල සිරිසේනට රුපියල් මිලියන 100ක්, හිටපු පොලිස්පති පූජිත් ජයසුන්දර සහ රාජ්‍ය බුද්ධි සේවයේ හිටපු අධ්‍යක්ෂ නිලන්ත ජයවර්ධනට රුපියල් මිලියන 75 බැගින්, හිටපු ආරක්ෂක ලේකම් හේමසිරි ප්‍රනාන්දුට රුපියල් මිලියන 50ක් සහ හිටපු ජාතික බුද්ධි ප්‍රධානි සිසිර මෙන්ඩිස්ට රුපියල් මිලියන 10ක මුදලක් වින්දිතයින්ට වන්දි ලෙස ගෙවිය යුතු බවටයි ශ්‍රේෂ්ඨාධිකරණය නියෝග කළේ.
රාජ්‍ය බුද්ධි සේවයේ හිටපු අධ්‍යක්ෂ නිලන්ත ජයවර්ධන හැර අනෙකුත් වග උත්තරකරුවන් අදාළ වන්දි මුදල් මීට පෙර ගෙවා අවසන් කර තිබූ අතර, නිලන්ත ජයවර්ධනට ගෙවීමට තිබූ රුපියල් මිලියන 65ක හිඟ වන්දි මුදල අද දිනයේ ගෙවා අවසන් කළ බව අධිකරණයට දැනුම් දුන්නා.
මේ අතර අධිකරණය නියම කළ නියමිත දිනට එම වන්දි මුදල් ගෙවා අවසන් කිරීමට නොහැකිවීම හේතුවෙන් රාජ්‍ය බුද්ධි සේවයේ හිටපු අධ්‍යක්ෂ නිලන්ත ජයවර්ධන අද (07) ශ්‍රේෂ්ඨාධිකරණයෙන් සමාව අයැද සිටියා.
