දිල්ලි මහ ඇමති ලෙස කටයුතු කළ අරවින්ද් කෙජ්රිවාල් එම තනතුරෙන් ඉල්ලා අස්වීමෙන් පසු දිල්ලි නව ප්‍රධාන අමාත්‍යවරිය ලෙස අතිෂි මර්ලේනා වැඩ භාරගන්නා බව පාලක ආම් ආද්මි පක්ෂය දැනුම් දී තිබෙනවා.
අද (17) පැවති ආම් ආද්මි පක්ෂයේ ව්‍යවස්ථාදායක රැස්වීමේ දී මෙම තීරණය ගෙන ඇති බවයි ඉන්දීය මාධ්‍ය වාර්තා කළේ.
ආම් ආද්මි පක්ෂයේ ජාතික කැඳවුම්කරු අතිෂි මර්ලේනාගේ නම මේ සඳහා යෝජනා කර ඇති අතර, එහි සියලුම මන්ත්‍රීවරුන් නැගී සිට එය ස්ථිර කර තිබෙනවා.
අරවින්ද් කෙජ්රිවාල් දිල්ලි මහ ඇමති ලෙස කටයුතු කළ කාලය තුළ දිල්ලි රජයේ අධ්‍යාපන සහ පොදු කාර්ය අමාත්‍යංශය භාරව අතිෂි කටයුතු කරනු ලැබුවා.
ඔක්ස්ෆර්ඩ් විශ්ව විද්‍යාලයේ ආදි ශිෂ්‍යාවක් වන 43 හැවිරිදි ඇය දිල්ලියේ පාසල්වල අධ්‍යාපනය ප්‍රතිසංස්කරණය කිරීම සඳහා ප්‍රමුඛත්වය ගෙන කටයුතු කළා.
55 හැවිරිදි කෙජ්රිවාල් ප්‍රකාශ කළේ තමාට එරෙහිව ඇති දූෂණ නඩුවට අදාළව ඇප මත නිදහස් වූ දිනට පසු තමා දිල්ලි මහ ඇමති ධුරයෙන් ඉල්ලා අස්වන බවයි.
