Update:- ‘ක්ලබ් වසන්ත’ නමැත්තාගේ ඝාතනය මෙරට ප්‍රමුඛ පෙළේ සංවිධානාත්මක අපරාධ කල්ලි නායකයෙකු වන කංජිපානි ඉම්රාන්ගේ සැලැස්මක් විය හැකි බවට පොලිසිය සැක පළ කරනවා.
මේ වනවිට (08) පොලිස් විමර්ශනවලින් සොයාගෙන ඇති තොරතුරු අනුව වෙඩි තැබීම සිදු වූ ස්ථානයේ තිබී ටී56 ගිනි අවියේ උණ්ඩයක් වැටී ඇති අතර; එහි සඳහන් කර ඇත්තේ ‘KPI’ යනුවෙන්.
එම කෙටි යෙදුමෙන් බොහෝ විට ඉස්මතු වන්නේ; ‘ කංජි පානි ඉම්රාන්’ විය හැකි බවටයි පොලිසිය සැක පළ කරන්නේ.
ඒ පිළිබඳ ව වැඩිදුර විමර්ශන සිදු කිරීමට අපරාධ ස්ථානයේ වැටී තිබූ උණ්ඩය පොලිස් භාරයට ගෙන තිබෙනවා.
අතුරුගිරිය නගරයේ ටැටූ ආයතනයක් විවෘත කිරීමේ අවස්ථාවට ප්‍රධාන ආරාධිත අමුත්තෙකු වශයෙන් එක් ව සිටි ක්ලබ් වසන්ත නොහොත් සුරේන්ද්‍ර වසන්ත නමැත්තා ඉලක්ක කරගෙන මෙම වෙඩි තැබීම අද උදෑසන දී සිදු වූ අතර; එහිදී ක්ලබ් වසන්ත, නයන වාසල නමැත්තෙක් ජීවිතක්ෂයට පත් වුණා.
ජනප්‍රිය ගායන ශිල්පිනී කේ. සුජීවා, මියගිය වසන්තගේ බිරිඳ සහ ටැටූ ආයතන හිමිකරුගේ බිරිඳ ඇතුළු සය දෙනෙක් බරපතළ තුවාල ලබා රෝහල්ගත කෙරුණා.
