වන ආරක්‍ෂක තනතුර සඳහා කිලෝමීටර් 25 ක ඇවිදීමේ පරීක්ෂණය සම්පූර්ණ කිරීමට උත්සාහ කළ තරුණයෙක් අවාසනාවන්ත ලෙස ජීවිතක්ෂයට පත් වූ පුවතක් ඉන්දියාවෙන් වාර්තා වනවා.
ඉන්දියාවේ මධ්‍ය ප්‍රදේශ්හි බලගාට් ප්‍රදේශයේ දී මෙම සිදුවීම සිදුව ඇති අතර, මෙලෙස මියගොස් ඇත්තේ සලීම් මෞර්යා නැමැති තරුණයෙක්.
වන සංරක්ෂණ දෙපාර්තමේන්තුවේ වන ආරක්‍ෂක තනතුර සඳහා ලිඛිත විභාගයෙන් පසු, පැය හතරකින් නිම කළ යුතු කිලෝමීටර් 25ක ඇවිදීමේ ශාරීරික යෝග්‍යතා පරීක්ෂණයට අයදුම්කරුවන් 108 දෙනෙකු පෙනී සිට තිබෙනවා.
එහිදී මෙම පා ගමන පෙරවරු 6.00ට ආරම්භ වී ඇති අතර, පරීක්ෂණයේ කිලෝමීටර් තුන සම්පූර්ණ කිරීමට පෙර මෙම තරුණයා හදිසි රෝගී තත්ත්වයකට පත්ව ඇති බවයි වාර්තා වන්නේ.
එහිදී ඔහුව වහාම රෝහල් ගත කිරීමට කටයුතු කර ඇති අතර, එහිදී ඔහු මියගොස් ඇති බවයි වැඩිදුරටත් තොරතුරු වාර්තා වුණේ.
මේ අතර පරීක්ෂණය සඳහා සහභාගී වූ 108 දෙනාගෙන් 104 දෙනෙකු අදාළ කාල සීමාව තුළ එය සම්පූර්ණ කර තිබෙනවා.
ලිඛිත විභාගය සමත් වූ පසු ලේඛන සත්‍යාපනය සහ ශාරීරික පරීක්ෂණය සඳහා මෞර්යා පසුගිය 23 වනදා බලගාට් වෙත ගිය බවයි ඔහුගේ සොහොයුරා පවසන්නේ.
