පසුගිය සමයේ නිසි මූල්‍ය කළමණාකරණයක් ක්‍රියාත්මක නොකිරීම හේතුවෙන් සිය ව්‍යාපාරයට සිදු වූ හානිය වෙනුවෙන් ව්‍යාපාරිකයෙකු හිටපු ජනාධිපති ගෝඨාභය රාජපක්ෂ ඇතුළු පිරිසකට එන්තරවාසි යොමු කර තිබෙනවා.
ව්‍යාපාරිකයා තමන්නට සිදූ වූ මූල්‍ය හානිය වෙනුවෙන් ඉල්ලා සිටින වන්දි මුදල රුපියල් මිලියන 50ක්.
2019 වසරේ සිට 2022 වසර දක්වා වූ කාලය අතරතුර දී තම ව්‍යාපාරයට සිදු වූ හානියට රුපියල් මිලියන 50ක වන්දි ගෙවන ලෙස දන්වා ව්‍යාපාරිකයකු වන කාලිංග සිල්වා හිටපු ජනාධිපති ගෝඨාභය රාජපක්ෂ ඇතුළු පිරිසකට එන්තරවාසි යවා තිබෙනවා.
හිටපු අගමැති මහින්ද රාජපක්ෂ, හිටපු මුදල් අමාත්‍ය බැසිල් රාජපක්ෂ හා හිටපු මහ බැංකු අධිපති අජිත් නවාඩ් කබ්රාල් යන අයට හා ශ්‍රී ලංකා මහ බැංකුවේ මූල්‍ය මණ්ඩලයේ එවකට සාමාජිකයන් එන්තරවාසි යොමු කළ සෙසු පිරිසයි.
නිසි මූල්‍ය කළමනාකරණයක් පවත්වාගෙන යෑමට අපොහොසත්වීම නිසා සිය ව්‍යාපාරයට හානි සිදු වූ බව ව්‍යාපාරිකයා සිය එන්තරවාසියෙන් පෙන්වා දී තිබෙනවා.
එහි වැඩිදුරටත් සඳහන් කර ඇත්තේ දින 14ක් ඇතුළත එම වන්දි මුදල ගෙවීමට අපොහොසත් වුවහොත් නඩු පවරා එම වන්දි මුදල අයකර ගැනීම සඳහා පියවරගන්නා බවයි.
නීතිඥ ප්‍රමෝද් පොල්පිටිය මගින් එම එන්තරවාසි යොමු කර තිබෙනවා.
ශ්‍රේෂ්ඨාධිකරණය විසින් මේ වනවිටත් නිකුත් කර ඇති මූලික අයිතිවාසිකම් පෙත්සම් සම්බන්ධයෙන් වූ තීන්දු ප්‍රකාශය අනුව රටේ ආර්ථික පරිහානියට හිටපු ජනාධිපති ගෝඨාභය රාජපක්ෂ ඇතුළු පෙරකී පිරිස වගකිව යුතු බවට නිගමනය කර ඇති බැවින් එකී කාලසීමාව තුළදී තමන්ගේ ව්‍යාපාර කඩාවැටීමෙන් සිදුවූ හානියට එකී වන්දි මුදල අයකර ගැනීමට තීරණය කළ බව ව්‍යාපාරික කාලිංග සිල්වා සිය එන්තරවාසි මගින් පවසනවා.
රුපියල අවප්‍රමාණ වීම, ආනයන තහනම් කිරීම සහ දිනපතා සිදු වූ විදුලි කප්පාදුව හේතුවෙන් ආනයනයට අදාළ ව්‍යාපාරයක නිරතව සිටි තමන්ගේ ව්‍යාපාර කටයුතු බිඳ වැටුණු බව එම ව්‍යාපාරිකයා පෙන්වා දෙනවා.
