නීති විරෝධී ලෙස මෙරට නිෂ්පාදනය කරන ලද ගිනි අවියක් යතුරු පැදියකින් රැගෙන යමින් සිටි පුද්ගලයින් දෙදෙනෙකුට පුත්තලම මහේස්ත්රාත්වරයා විසින් රුපියල් 10,000 බැගින් දඩ මුදල් නියම කර ඇත.
මහේස්ත්රාත්වරයා විසින් දඩ නියම කර ඇත්තේ මදුරන්කුලිය කොත්තන්තිව් පදිංචිකරුවෙකු වන මොහොමඩ් කයිස් මොහොමඩ් ෆර්තාන් සහ මදුරන්කුලිය – කනමුල්ල පදිංචි මොහොමඩ් ජුෆ්රි මොහොමඩ් ජෆ්රාත් නම් දෙදෙනෙකුටය.
ඉකුත් 03 වැනිදා යතුරු පැදියකින් ගමන් කරමින් සිටි සැකකරුවන් දෙදෙනාව පුත්තලම කොට්ඨාස යතුරු පැදි ඒකකයේ නිලධාරීන් විසින් මදුරන්කුලිය ප්රදේශයේදී පරීක්ෂාවට ලක් කර ඇත.නීති විරෝධී ලෙස මෙරට නිෂ්පාදනය කරන ලද බලපත්ර රහිත ගිනි අවිය සැකකරුවන් සතුව තිබී පොලිස් නිලධාරීන් විසින් එම අවස්ථාවේදී සොයා ගෙන ඇත.
අනතුරුව සැකකරුවන් දෙදෙනා,ඔවුන් ගමන් කරමින් සිටි යතුරු පැදිය සහ නීති විරෝධී ගිනි අවිය වැඩිදුර විමර්ශණ කටයුතු සදහා මදුරන්කුලිය පොලීසියට බාර දීමට කොට්ඨාස රථවාහන අංශයේ නිලධාරීන් කටයුතු කර ඇත.
සැකකරුවන්ගෙන් ප්රකාශ ලබා ගැනීමෙන් අනතුරුව ඔවුන් දෙදෙනාව 03 වැනිදා සවස පුත්තලම මහේස්ත්රාත්වරයා හමුවට ඉදිරිපත් කිරීමට මදුරන්කුලිය පොලීසියේ නිලධාරීන් කටයුතු කර ඇත.සැකකරුවන්ට දඩ මුදල් නියම කර ඇති මහේස්ත්රාත්වරයා ඔවුන් සතුව තිබී පොලිස් බාරයට ගෙන ඇති විරෝධී ගිනි අවිය රාජසන්තක කිරීමට නියෝග කර ඇත.
