දේශසීමා හරහා ජෝර්දානය සිට ඊශ්‍රායලයට සංක්‍රමණයවීමට උත්සාහ කළ ශ්‍රී ලාංකිකයන් තිදෙනෙක් නීති නිලධාරීන්ට හසුවී ඇති බවට මේ වනවිට තොරතුරු වාර්තා වන බව ශ්‍රී ලංකා විදේශ සේවා නියුක්ති කාර්යාංශයේ මාධ්‍ය ප්‍රකාශක ගාමිණි සෙනරත් පවසනවා.
මෙම ශ්‍රී ලාංකිකයින් තිදෙනා පසුගිය ඔක්තෝම්බර් 07 වනදා මෙරට දේශසීමා හරහා සංක්‍රමණයවීමට උත්සාහ කළ අවස්ථාවේ දී නීති නිලධාරීන්ට හසුව ඇති බවයි මාධ්‍ය ප්‍රකාශකවරයා වැඩිදුරටත් පැවසුවේ.
එම ශ්‍රී ලාංකිකයින් තිදෙනාට එරෙහිව නීතිය ක්‍රියාත්මක වී ඇති බව ද ඔහු මාධ්‍යවෙත අදහස් දක්වමින් සඳහන් කර සිටියා.
මේ අතර හමාස් සංවිධානය සහ ඊශ්‍රායල අතර යුද්ධය අතර තුර ජෝර්දානය සිට ඊශ්‍රායලයට සංක්‍රමණයවීමට උත්සාහ දැරූ ශ්‍රී ලාංක්කික කාන්තාවන් දෙදෙනෙකු පිළිබඳව ද පසුගිය දා තොරතුරු වාර්තා වුණා.
ඔවුන් දෙදෙනා ඊශ්‍රායලය ආරක්ෂක අංශය විසින් අත්අඩංගුවට ගැනීමෙන් අනතුරුව යළි ජෝර්දානය වෙත පිටුවහල් කළ බවට පසුව අනාවරණය වුණා.
මෙලෙස නීති විරෝධීව දේශසීමා තරණය කරමින් තවත් රටකට යෑම ඉතා බරපතළ චෝදනාවක් බවත්, යුධමය තත්ත්වයක් පවතින රටකට මෙලෙස ඇතුළුවීමේ දී ඔවුන් ත්‍රස්තවාදීන් ලෙස සළකමින් නීතිය ක්‍රියාත්මක කිරීමට වැඩි ඉඩක් පවතින බව ද මාධ්‍ය ප්‍රකාශකවරයා සඳහන් කර සිටියා.
