ඉන්දියාවේ චෙන්නායි නුවර සිට නීති විරෝධීව මෙරටට රත්‍රං රැගෙන ආ කාන්තාවන් දෙදෙනෙකු ඇතුලු 3 දෙනෙකු ගුවන්තොටුපල මත්ද්‍රව්‍ය නාශක කාර්යාංශය විසින් අත්අඩංගුවට ගෙන තිබෙනවා.
AI 273 දරණ ගුවන් යානයෙන් කාන්තාවන් දෙදෙනා කටුනායක ගුවන්තොටුපලට පැමිණ ඇත්තේ අද අලුයම 2.30ට පමණයි.
සැකකාර කාන්තාවන් දෙදෙනා කැරට් 22 රන් ආභරණ ග්‍රෑම් 408ක් සහ තවත් ග්‍රෑම් 200ක් බරැති රන් මාල 4ක් රැගෙන විත් ඇති බවටයි අනාවරණ වී ඇත්තේ.
වෙන්නප්පුව උඩප්පුව ප්‍රදේශයේ පදිංචි අවුරුදු 53 සහ 43 යන වයස්වල පසු වූ සැකකාර කාන්තාවන් දෙදෙනා සම්බන්ධයෙන් ලැබුණු තොරතුරකට අනුවයි වැටලීම සිදු කර තිබෙනවා.
මේ අතර අද උදෑසන 9.25ට පමණ FZ 547 දරණ යානයෙන් ඩුබායි රාජ්‍යයේ සිට පැමිණි මරදාන ප්‍රදේශයේ පදිංචි 44 හැවිරිදි ව්‍යාපාරිකයෙකු චංචනික ලෙස කැරට් 22 සහ 24 රත්‍රං කිලෝ 6යි ග්‍රෑම් 996ක් ඉතා සූක්ෂමන උදරයේ බැඳගෙන මෙරටට රැගෙන විත් තිබෙනවා.
එහි රත්‍රං බිස්කට් 40කට වැඩි ප්‍රමාණයක් තිබී ඇති අතර අනෙක් ඒවා විවිධ වර්ගයේ ස්වර්ණාභරණ බව සඳහන්.
ලැබුණු තොරතුරකට අනුව ගුවන්තොටුපල මත්ද්‍රව්‍ය නාශක කාර්යාංශය මගින් සැකකරු අත්අඩංගුවට ගනු ලැබුවා.
සැකකාරියන් දෙදෙනා සහ සැකකරුවන් ගුවන්තොටුපල රේගුවට ඉදිරිපත් කර නීතිමය පියවර ගැනීමට නියමිතයි.
