“අස්වැසුම” සුබසාධන ප්‍රතිලාභ ගෙවීමේ ක්‍රමය ජූලි 01 වැනිදා සිට හඳුන්වා දෙමින් ජනාධිපති රනිල් වික්‍රමසිංහ මහතා විසින් අතිවිශේෂ ගැසට් නිවේදනයක් නිකුත් කර තිබෙනවා.
එමගින් සංක්‍රාන්තික, අවදානමට ලක් වූ, දුප්පත් සහ අන්ත දිළිඳු යන කාණ්ඩ වශයෙන් දීමනා ලබා දීමට නියමිතයි.
මේ යටතේ සුබසාධක දීමනා හිමිවන සමස්ත පවුල් සංඛ්‍යාව ලක්ෂ 20ක් පමණ වනවා.
“සංක්‍රාන්තික” යන සුබ සාධක ප්‍රතිලාභ ගෙවීම් ලබන සමාජ කාණ්ඩයමට ලබන දෙසැම්බර් මස 31 වනදා දක්වා මාසිකව රුපියල් 2500ක මුදලක් හිමිවනු ඇති.
එම කාණ්ඩයෙන් පවුල් ලක්ෂ 4ක් මෙම දීමනාවට සුදුසුකම් ලබා තිබෙනවා.
“අවදානමට ලක් වූ” යන කාණ්ඩය යටතේ ලබන 2024 වසරේ මාර්තු මස 31 වනදා දක්වා මාසිකව රුපියල් 5000ක දීමනාවක් හිමිවනු ඇති. ඒ සඳහා පවුල් ලක්ෂ 4ක් සුදුසුකම් ලබා ඇති බවයි ජනාධිපතිවරයා නිකුත් කළ ගැසට් නිවේදනයේ දැක්වෙන්නේ.
“දුප්පත්” යන කාණ්ඩය යටතේ ලබන ජුලි මස පළමුවනදා සිට වසර 3ක් දක්වා මාසිකව රුපියල් 8500ක දීමනාවක් ලැබෙන අතර ඒ සඳහා පවුල් ලක්ෂ 8ක් සුදුසුකම් ලබා තිබෙනවා.
“අන්ත දිළිඳු” කාණ්ඩයමට ද ජුලි මස පළමුවනදා සිට වසර 3ක් දක්වා රුපියල් 15000ක මාසික දීමනාවක් ලැබෙන අතර ඊට සුදුසුකම් ලබා ඇති පවුල් සංඛ්‍යාව ලක්ෂ 4ක්.
