ඉන්දියාව මේ වසරේ මැද භාගය වන විට චීනය අභිබවා ලොව වැඩිම ජනගහනයක් සිටින රට බවට පත්වීමට නියමිත බව එක්සත් ජාතීන්ගේ සංවිධානය නිකුත් කළ දත්ත පෙන්වා දෙනවා.
ඉන්දියාවේ ජනගහනය බිලියන 1.4286 දක්වා ළඟා වනු ඇතැයි අපේක්ෂා කෙරෙන අතර එය අසල්වැසි චීනයේ ජනගහනය වන බිලියන 1.4257ට වඩා මිලියන 2.9ක වැඩිවීමක්.
වසර 70කට වැඩි කාලයක් මුළුල්ලේ ලෝක ජනගහනයෙන් තුනෙන් එකකට වඩා වැඩි ප්‍රමාණයක් ආසියානු ජාතීන් සතුයි.
විදෙස් වාර්තා පෙන්වා දෙන්නේ 1961 වසරෙන් පසු ප්‍රථම වතාවට චීනයේ උපත් අනුපාතිකය පසුගිය වසරේ සිට අඩුවීමක් පෙන්නුම් කෙරෙන බවයි.
කෙසේ වෙතත්, ඉන්දියාවේ ජනගහන සංඛ්‍යාව නිවැරදිව තහවුරු කර ගැනීමට 2011 වසරෙන් පසු රට තුළ සංගණනයක් සිදු කර නොමැති බැවින් පවතින්නේ ඇස්තමේන්තුවක් පමණයි.
නොවැම්බර් මාසයේදී ගෝලීය ජනගහනය බිලියන 8 ඉක්මවා ගිය ද ප්‍රවීණයන් පවසන්නේ වර්ධනය වෙනදා තරම් වේගවත් නොවන බවත් 1950 න් පසු අඩුම අගයක පවතින බවයි.
