මස්කෙළිය සෞඛ්‍ය වෛද්‍ය නිලධාරී කාර්යාලය යටතේ පාලනය වන නල්ලතන්නිය මහජන සෞඛ්‍ය පරික්ෂක කාර්යාලයේ නිලධාරීන් දෛනික රාජකාරි කටයුතුවලින් සතියක පමණ කාලයක සිට ඉවත් වී ඇති බව මස්කෙළිය සෞඛ්‍ය වෛද්‍ය නිලධාරී කාර්යාලයේ පරිපාලන මහජන සෞඛ්‍ය පරික්ෂක එස්. බාස්කරන් මහතා පවසනවා.
ශ්‍රී පාද වන්දනා සමය ආරම්භ වීමත් සමග නල්ලතන්නිය මහජන සෞඛ්‍ය පරීක්ෂක කාර්යාලයට සතියකට වරක් නුවරඑළිය දිස්ත්‍රික් සෞඛ්‍ය සේවා අධ්‍යක්ෂක කාර්යාලය යටතේ පාලනය වන සියළුම සෞඛ්‍ය වෛද්‍ය නිලධාරී කාර්යාලවල සේවය කරන මහජන සෞඛ්‍ය පරික්ෂකවරුන් 4 දෙනෙකු රාජකාරියේ යොදවන බවයි ඔහු සඳහන් කළේ.
එම නිලධාරින්ට ගෙවිය යුතු අතිකාල දීමනා ගෙවිම අත්හිටු වීමත් සමග නල්ලතන්නිය මහජන සෞඛ්‍ය පරීක්ෂක කාර්යාලයේ මහජන සෞඛ්‍ය පරීක්ෂකවරුන් රාජකාරී කටයුතුවලින් ඉවත්ව සිටින බව එස්.බාස්කරන් මහතා කියාසිටියා.
එම මහජන සෞඛ්‍ය පරීක්ෂකවරුන් සතියක කාලයක් කාර්යාලයේම රැඳී සිටිමින් දිවා රාත්‍රී දෙකේම රාජකාරී කරන අතර ඔවුන්ට දිනකට අවම වශයෙන් රුපියල් 1500ක පමණ මුදලක් ආහාර පාන ලබා ගැනීම සඳහා වැය වන බව සඳහන්.
අතිකාල දීමනා ගෙවීම අත්හිටුවීම හේතුවෙන් දිනකට වැයවන එම මුදල දරාගත නොහැකි වීම හමුවේ ඔවුන් රාජකාරී කටයුතුවලින් ඉවත් වන බවට දැනුම් දී ඇති බවයි එස්.බාස්කරන් මහතා කියාසිටියේ.
ශ්‍රී පාද වන්දනා සමය ආරම්භ වීමත් සමග හැටන් මාර්ගය ඔස්සේ ශ්‍රී පාදය කරුණා කිරීමට පැමිණෙන අතර, එසේ පැමිණෙන වන්දනාකරුවන් වැඩි පිරිසක් ආහාර පාන ලබා ගන්නේ නල්ලතන්නිය නගරයෙන්.
මහජන සෞඛ්‍ය පරික්ෂකවරුන් නල්ලතන්නියේ රාජකාරි කටයුතුවලින් තාවකාලිකව ඉවත් වීමත් සමග වන්දනාකරුවන්ගේ පානීය ජලය ඇතුළු සෞඛ්‍යට ගැටළු රැසක් ඇති වීමේ අවධානමක් පවතින අතර, මෙම ගැටළුව සම්බන්ධයෙන් මධ්‍යම පළාත් සෞඛ්‍ය සේවා අධ්‍යක්ෂකවරයා දැනුවත් කර ඇති බවයි පරිපාලන මහජන සෞඛ්‍ය පරික්ෂකවරයා කියාසිටියේ.
