ශ්රී ලංකාවේ නිල සංචාරයක නිරත වන පාකිස්ථාන නාවික හමුදා ප්රධානී අද්මිරාල් මුහම්මඩ් අම්ජාඩ් ඛාන් නිආසි අද නාවික හමුදා මූලස්ථානයේදී නාවික හමුදාධිපති, වයිස් අද්මිරාල් ප්රියන්ත පෙරේරා හමු වී තිබෙනවා.
පාකිස්ථාන නාවික හමුදා ප්රධානී සිව්දින නිල සංචාරයක් සඳහා අද උදෑසන දිවයිනට පැමිණි අතර, එහිදී බටහිර නාවික විධානයේ ආඥාපති, රියර් අද්මිරාල් සුරේෂ් ද සිල්වා විසිනුයි ඔහු උණුසුම් අයුරින් පිළිගනු ලැබුවේ.
මෙම නිල හමුවේදී, පාකිස්ථාන නාවික හමුදා ප්රධානී සහ ශ්රී ලංකා නාවික හමුදාධිපති අතර ද්විපාර්ශ්වීය වශයෙන් දෙරටේ නාවික හමුදාවන්ට අදාළ වැදගත් කරුණු සහ දෙරටේ දිගුකාලීන මිත්රශීලී සබඳතාවය පිළිබඳ සුහද පිළිසඳරක් පැවැත්වීමෙන් අනතුරුව, මෙම හමුව සනිටුහන් කරමින් දෙපාර්ශවය අතර, සමරු තිළිණ හුවමාරුවක් ද සිදු කෙරුණා.
එමෙන්ම, හමුව සනිටුහන් කරමින් පාකිස්ථාන නාවික හමුදා ප්රධානී, ශ්රී ලංකා නාවික හමුදාධිපති ඇතුළු නාවික හමුදා කළමණාකරණ මණ්ඩලය සමඟ සමූහ ඡායාරූපයකට පෙනී සිටීමෙන් අනතුරුව, නාවික හමුදාධිපති කාර්යාලයේ විශේෂ අමුත්තන්ගේ සමරු පොතෙහි සටහනක් තැබීමද සිදු වූ බව සඳහන්.
පාකිස්ථාන නාවික හමුදා ප්රධානී ගේ, මෙම නිල සංචාරයේදී ඔහු ජනාධිපති, ආරක්ෂක ලේකම්, ආරක්ෂක මාණ්ඩලික ප්රධානී, යුද සහ ගුවන් හමුදාධිපතිවරුන් හමුවීමටත්, නැගෙනහිර නාවික විධාන මූලස්ථානයේ සහ ත්රිකුණාමලය නාවික හා සාගරික විද්යාපීඨයේ සංචාරය කිරීමට ඇතුළු ශ්රී ලංකා නාවික හමුදාව විසින් සංවිධානය කරනු ලබන වැඩසටහන් සඳහා සහභාගී වීමට නියමිතයි.
සිව්දින නිල සංචාරය නිමා කරමින් පාකිස්ථානු නාවික හමුදා ප්රධානියා, ලබන 28 වන දින දිවයිනෙන් පිටත්ව යාමට නියමිතයි.
