වඳුරු උණ (මන්කි පොක්ස්) රෝගය ශ්රී ලංකාව තුළ පැතිරයෑම වළක්වාගැනීම සදහා ගුවන්තොටුපොළ ඇතුළු ස්ථානවල නිරීක්ෂණ කටයුතු ශක්තිමත් කිරීමට බලධාරීන් පියවර ගත යුතු බව රජයේ වෛද්ය නිලධාරීන්ගේ සංගමය සඳහන් කරනවා.
වඳුරු උණ ආසාදිතයෙක් මෙරටින් හඳුනාගැනීම සම්බන්ධයෙන් අදහස් දක්වමින් එම සංගමයේ ලේකම් වෛද්ය හරිත අලුත්ගේ මේ බව සඳහන් කළා.
එමෙන්ම ආසාදිතයෙකුගේ තුවාලවල ශ්රාවයන් ඝෘජුවම ස්පර්ශවීමෙන් තවත් අයෙකුට එය ආසාදනය විය හැකි බවයි ඔහු පෙන්වා දෙන්නේ.
එමෙන්ම ලිංගාශ්රිත අවයව සහ ගුද මාර්ගය ආශ්රිතව තුවාල තත්ත්වයන් ඇත්නම් වහාම වෛද්ය ප්රථිකාරවලට යොමුවන ලෙසයි වෛද්ය හරිත අලුත්ගේ දන්වා සිටියේ.
එමෙන්ම මේ සම්බන්ධයෙන් නිෂ්චිත තහවුරු කරගැනීමක් සිදුකර, රෝගය සම්පූර්ණයෙන් සුවවන තෙක් ලිංගික ක්රියාකාරකම්වලින් වැළකෙන ලෙසට ද දැනුම් දෙනවා.
රටක් ලෙස මෙම රෝගී තත්ත්වය සම්බන්ධයෙන් ගනු ලබන්නේ කුමන ක්රියාමාර්ග ද යන්න තාක්ෂණික කමිටුව හරහා ප්රකාශයට පත් කරනතෙක් අනවශ්ය කලබලයකින් තොරව මේ පිළිබඳ අවදානයෙන් සිටින ලෙසයි එම සංගමය
ජනතාවගෙන් ඉල්ලා සිටින්නේ.
පසුගිය පළමු වනදා ඩුබායි සිට පැමිණි වයස අවුරුදු 20ක තරුණයෙකු වඳුරු උණ රෝගියෙකු ලෙස හඳුනාගෙන ඇති බව වෛද්ය පර්යේෂණ ආයතනය සඳහන් කළා.
මේ අතර, එම ආසාදිතයා ප්රතිකාර සඳහා කොළඹ අයි.ඩී.එච්. රෝහල වෙත යොමු කිරීමටයි පියවර ගෙන තිබුණේ.
