පසුගිය වසරේ දැඩි ආන්දෝලනයකට තුඩු දුන් 5 ශ්‍රේණිය ශිෂ්‍යත්ව විභාගය මෙවර කඩයිම් ලකුණු අබිබවා යමින් ඉහළ ලකුණු ලබා ගත් සංඛ්‍යාව 51,244ක් බවට පත් ව තිබෙනවා.
ශ්‍රී ලංකා විභාග දෙපාර්තමේන්තුව නිකුත් කළ නිවේදනයේ දැක්වෙන්නේ ශිෂ්‍යත්ව විභාගයට 319,284 දෙනෙකු ඉදිරිපත් වී ඇති බවයි.
ඉන් දෙලක්ෂ හැට අටදහස් හතළිහක (268,040) සිසුන් සංඛ්‍යාවක් 5 ශ්‍රේණිය ශිෂ්‍යත්ව විභාගය තමන්ට හිමි කඩයිම් ලකුණු සීමාව ඉක්මවා යාමට නොහැකි මට්ටමට පත් ව තිබෙනවා.
පසුගිය වසරේ 5 ශ්‍රේණිය ශිෂ්‍යත්ව විභාගය යොමු වී ඇති අයදුම් පත්‍ර සංඛ්‍යාව 323,900ක් බවත් සඳහන්.
කෙසේවෙතත් තම ප්‍රතිඵල නැවත සමීක්ෂණය කිරීමට අභියාචනා කිරීමට ද විභාග දෙපාර්තමේන්තුව අවස්ථාව ලබා දී තිබෙනවා.
ඒ අනුව ජනවාරි මස 27 වැනි දින සිට පෙබරවාරි මස 06 වැනි දින තෙක් අදාළ කාලසීමාව තුළ මාර්ගගත ක්‍රමයට නැතහොත් ඔන්ලයින් ක්‍රමවේදය ඔස්සේ පමණක් සිය අභියාචනා ඉදිරිපත් කළ යුතු බවයි වාර්තා වන්නේ.
ශිෂ්‍යත්ව විභාගය සමත් අඩු ආදායම්ලාභී පවුල්වල තෝරාගත් දරුවන් 20,000කට ශිෂ්‍යාධාර අරමුදල් හිමිගැන්වෙනවා.
ඒ සඳහා ද අයදුම් කරන ආකාරය පහත දැක්වෙන නිවේදනය ප්‍රකාරව කටයුතු කළ හැකියි.
