විශ්වයේ මහා ක්‍රීඩා සැණකෙළිය ලෙස හඳුන්වන, 2024 පැරිස් ඔලිම්පික් උළෙල අති උත්කර්ෂවත් ලෙස ඊයේ (26) රාත්‍රියේ ආරම්භ වුණා.
ප්‍රංශයේ හදවත බඳු වූ සෙන් නදිය මුල්කර ගනිමින් පැවති ඔලිම්පික් සමාරම්භක උත්සවය අලංකාරවත් මුහුණුවරක් ගනු ලැබුවා.
මෙලෙස ක්‍රීඩාංගණයකින් පිටත ස්ථානයක ඔලිම්පික් සමාරම්භක උත්සවයක් පවත්වනු ලැබුවේ ඔලිම්පික් ඉතිහාසයේ පළමුවරට වීම ද විශේෂත්වයක්.
‘බෙදාහදා ගැනීම සඳහා නිර්මාණය කරන ලද’ යන්න තේමාව මූලික කරගත් මෙවර ඔලිම්පික් උළෙල ආරම්භ වුණේ ප්‍රංශ ජනාධිපති එමානුවෙල් මැක්රෝන්ගේ ප්‍රධානත්වයෙන්.
අධික වැසි මාධ්‍යයේ වුවද පැවති මෙම අලංකාරවත් සමාරම්භක උත්සවය නැරඹීම වෙනුවෙන් සේන් නදිය දෙපස සකසා තිබූ නැරඹුම් ස්ථාන වෙත ප්‍රේක්ෂකයින් රැසක් එක්ව සිටි ආකාරය දැකගත හැකි වුණා.
300,000 කට වැඩි පිරිසක් ගඟ අද්දර සහ පාලම් සිට මෙම උත්සවය නැරඹීමට එක්ව සිටි අතර තවත් දහස් ගණනක් ගොඩනැගිලිවල ජනේල සහ සඳළුතලවල හිඳිමි මෙම විචිත්‍රවත් උත්සවය නැරඹීමට එක්ව සිටි බවයි විදෙස් මාධ්‍ය වාර්තා කළේ.
මෙවර ඔලිම්පික් තරගාවලිය එක්වන එක් එක් රටවලට අයත් කණ්ඩායම් බෝට්ටුවල නැඟ සෙයින් නදියේ කිලෝමීටර් 06ක දුරක් විචිත්‍රවත් සමාරම්භක පෙළපාලිය සඳහා එක්ව සිටියා.
මෙම සමාරම්භක උළෙලේ ක්‍රීඩක ක්‍රීඩිකාවන් ගමන් ගන්නා අතරතුර විචිත්‍රවත් ගායන මෙන්ම නර්ථනාංග රැසකින් ද ඔලිම්පිම් සමාරම්භක උළෙල වර්ණවත් වුණා.
ඔලිම්පික් සම්ප්‍රදායට අනුව සමාරම්භක පෙළපාලියේ ඉදිරියෙන්ම ග්‍රීසිය ගමන් ගත් අතර, ඉන් අනතුරුවයි අනෙකුත් ටවලට අයත් කණ්ඩායම් පෙළපාලිය සඳහා එක් වුණේ.
අනතුරුව ප්‍රංශ ජනාධිපති එමානුවෙල් මැක්රෝන් විසින් ඔලිම්පික් උළෙල ආරම්භය කළ බව නිල වශයෙන් ප්‍රකාශයට පත්කර සිටියා.
ලොව වටා රැගෙන ගිය ඔලිම්පික් ගිනිසිළුව ස්පාඤ්ඤ සුපිරි ටෙනිස් ක්‍රීඩක රෆායල් නඩාල් විසිල් ලබාදීමෙන් අනතුරුව ප්‍රංශ ජූඩෝ ක්‍රීඩිකා ටෙඩී රයිනර් සහ ඔලිම්පික් රන් පදක්කම් තුනක් දිනූ කෙටිදුර ධාවන ශූරී මාරි ජෝස් පෙරෙක් විසින් 2024 ඔලිම්පික් උළෙල වෙනුවෙන් නිර්මාණය කළ ඔලිම්පික් පහන දල්වනු ලැබුවා.
මෙලෙස ඇරඹුනු 2024 පැරිස් ඔලිම්පික් උලෙළේ දී පදක්කම් 2,600ක් වෙනුවෙන් ක්‍රීඩක ක්‍රීඩිකාවන් 10,714 දෙනෙක් අගෝස්තු 11 වනදා දක්වා තරග ඉසව් 329ක තරග වදිනු ඇති.
