2024 අධ්යයන පොදු සහතික පත්ර උසස් පෙළ විභාගයට අදාළ කාලසටහන විභාග දෙපාර්තමේන්තුවේ නිල වෙඩ් අඩවියෙන් පමණක් බාගත කරගන්නා ලෙස ශ්රී ලංකා විභාග
දෙපාර්තමේන්තුව දැනුම්දී තිබෙනවා.
අද (30) පෙරවරුවේ විශේෂ මාධ්ය හමුවක් කැඳවමින් විභාග කොමසාරිස් ජනරාල් අමිත් ජයසුන්දර මහතා පැවසුවේ උසස් පෙළ අපේක්ෂකයින්ගේ 2024 උසස් පෙළ විභාගය නොවැම්බර් 25 සිට දෙසැම්බර් 20 වනදා දක්වා පැවැත්වීමට සියලු කටයුතු සුදානම් කර අවසන් බවයි.
විභාගය පැවැත්වෙන දින සම්බන්ධයෙන් තීරණය කරනු ලැබුවේ පසුගිය මාර්තු මාසයේ දී බව පැවසු විභාග කොමසාරිස්වරයා උසස් පෙළ විභාගය පිළිබඳව සමාජ මාධ්ය තුළින් විශාල වශයෙන් වැරදි ප්රචාරයන් සිදු කරන බව පෙනී යන බව ද මෙහිදී අවධාරණය කළා.
ඒ අනුව දරුවන් අතර උසස් පෙළ විභාගය පැවැත්වෙන දින පිළිබඳ අවිනිශ්චිතභාවයක් ඇතිව තිබෙන බවත් එය නිවැරදි කිරීමේ අරමුණින් මාධ්ය හමුව පැවැත්වීමට තීරණය කළ බව ද හෙතෙම පැවසුවා.
සෑම විටම විභාග දෙපාර්තමේන්තුව විසින් සිදු කරනු ලබන නිල නිවේදන පමණක් විශ්වාස කරන ලෙසත් සමාජ මාධ්ය ඔස්සේ සිදු කරන ප්රචාරයන්ට නොරැවටෙන ලෙසත් විභාග කොමසාරිස්වරයා සිසුන්ගෙන් ඉල්ලා සිටිනවා.
ඒ අනුව උසස් පෙළ විභාගයේ ප්රවේශපත්ර ඉතා ඉක්මනින් අපේක්ෂකයින් අතට පත්කිරීමට නියමිත බවත් වාර්තා වනවා.
මෙවර උසස් පෙළ සඳහා විෂයන් 64ක් යටතේ අයදුම්කරුවන් 333,185 දෙනෙකු පෙනී සිටීමට නියමිත බවත්, ඉන් පාසල් අයදුම්කරුවන් 253,390ක් සිටින බවත් පෞද්ගලික අයදුම්කරුවන් 79,795ක් අයදුම් කර ඇති බවත් විභාග කොමසාරිස්වරයා කියා සිටියා.
විභාග මධ්යස්ථාන 2,317ක දී මෙවර උසස් පෙළ විභාගය පැවැත්වීමට නියමිත අතර උතුරු පළාතේ ඩෙල්ෆ් සහ නයනතිව් දූපත්වලද විභාග මධ්යස්ථාන දෙකක් ස්ථාපිත කර ඇතැයි විභාග කොමසාරිස්වරයා සඳහන් කළා.
