ආහාර ඇනවුමක් භාරදීමට මහල් නිවාස සංකීර්ණයක පිහිටි නිවසකට ගිය බෙදාහැරීමේ නියෝජිතයෙකු සුනඛයෙකුගේ ප්‍රහාරයකින් බේරීමට යාමේදී තුන්වන මහලෙන් බිමට ඇද වැටී ජීවිතක්ෂයට පත් වූ පුවතක් විදෙස් මාධ්‍ය වාර්තා කරනවා.
ඉන්දියාවේ හයිද්‍රාබාද් හි මහල් නිවාස සංකීර්ණයක පසුගිය බදාදා මෙම සිදුවීම සිදුව ඇති බවයි වාර්තා වන්නේ.
මොහොමඩ් රිස්වාන් නැමැති 23 හැවිරිදි බෙදාහැරීමේ නියෝජිතක් මෙලෙස අවාසනාවන්ත ලෙස මියගොස් ඇති බව සඳහන්.
මෙම පුද්ගලයා ආහාර ඇනවුමක් ලබාදීම සඳහා බන්ජාරා හිල්ස් හි ලුම්බිණි රොක් කාසල් මහල් නිවාස සංකීර්ණයේ නිවසකට ගොස් තිබෙනවා.
එහිදී පාරිභෝගිකයාගේ නිවසේ සිටි සුනඛයා ඔහු වෙතට කඩා පැන ඇති අතර, සුනඛයාගෙන් බේරීම සඳහා රිස්වාන් දිවගොස් ඇති බවයි වාර්තා වන්නේ.
එම අවස්ථාවේ දී ඔහු මහල් නිවාස සංකීර්ණයේ තුන්වන මහලෙන් බිමට ඇද වැටී ඇති බවයි විදෙස් වාර්තා වැඩිදුරටත් සඳහන් කළේ.
අනතුරුව පාරිභෝගික කාන්තාව සහ අසල්වාසීන් එක්ව ඔහුව කඩිනමින් රෝහල් ගත කර ඇතත් ඉන් දින තුනකට පසු ඔහු අවාසනාවන්ත ලෙස ජීවිතක්ෂයට පත්ව තිබෙනවා.
මෙම සිදුවීම සම්බන්ධයෙන් අදාළ පාරිභෝගික කාන්තාවට එරෙහිව ඉන්දීය දණ්ඩ නීති සංග්‍රහයේ 304 (මිනීමැරුමක් නොවන සාපරාධී මිනීමැරුමක්) යටතේ නඩු පවරා ඇති බවයි වාර්තා වුණේ.
wpDiscuz
