එංගලන්ත පිතිකරු හැරී බෲක්ට ඉන්දීය ප්‍රිමියර් ලීගය වසර දෙකකට තහනම් කර තිබෙනවා.
ඉන්දීය ක්‍රිකට් පාලක මණ්ඩලය විසින් හැරීට මෙම තහනම පනවා ඇති බවයි වාර්තා වන්නේ.
ලබන 22 වනදා ආරම්භ වන 2025 අයි.පී.එල් තරගාවලිය වෙනුවෙන් හැරී දිල්ලි කැපිටල්ස් කණ්ඩායම වෙනුවෙන් ගිවිසුම් ගතව සිටි අතර, තරගාවලිය ආරම්භයට ආසන්නව තිබිය දී ඔහු මෙවර තරගාවලිය සඳහා ක්‍රීඩා නොකරන බවට දැනුම් දී තිබෙනවා.
අයි.පී.එල්. වෙන්දේසිය සඳහා ක්‍රීඩකයින් නම ලියාපදිංචි කිරීමට පෙර සෑම ක්‍රීඩකයෙකුටම දැනුම් දුන් කොන්දේසි හා ප්‍රතිපත්ති අනුව අත්‍යවශ්‍ය කරුණක දී හැර තරගාවලිය මඟහැරීමට ක්‍රීඩකයින්ට අවස්ථාව හිමිවන්නේ නැහැ.
හැරී බෲක් විසින් එම කොන්දේසි හා ප්‍රතිපත්තිවලට පරිබාහිරව කටයුතු කර ඇති බැවින් ඔහුට මෙලෙස වසර දෙකක කාලයක් අයි.පී.එල් තහනමක් පනවා තිබෙනවා.
ඉන්දීය ක්‍රිකට් පාලක මණ්ඩලය (BCCI) විසින් මෙම තීරණය එංගලන්ත සහ වේල්ස් ක්‍රිකට් මණ්ඩලයට දන්වා ඇති බවයි වාර්තා වන්නේ.
