කොළඹ ජාතික රෝහලේ රෝගී ප්රතිකාර සේවාවන්ට අදාළ සහ අනෙකුත් පරිපාලන කටයුතු පිළිබඳව සොයා බැලීම සහ පවතින ගැටළු සඳහා කඩිනම් විසදුම් ලබාදීමේ අරමුණින් සෞඛ්ය නියෝජ්ය අමාත්ය වෛද්ය හංසක විජයමුණිගේ ප්රධානත්වයෙන් රෝහල් පාලනාධිකාරිය සහ විශේෂඥ වෛද්ය, වෛද්ය, හෙද ඇතුළු කාර්ය මණ්ඩල සමග විශේෂ සාකච්ඡාවක් කොළඹ ජාතික රෝහලේ ශ්රවණාගාරයේ දී පසුගිය දා පැවැත්වුණා.
මෙහි දී රෝහලේ දැනට පවතින අඩුපාඩු සහ ප්රධාන ගැටළු පිළිබඳවත්, උපකරණ, ඖෂධ, මානව සම්පත්, පරිපාලන ආදී අනෙකුත් කරුණු මෙන් ම සංවර්ධන වැඩසටහන්, රසායනාගාර සේවා ගැටළු සහ පැමිණිලි ආදිය පිළිබඳවත් අමාත්යවරයා කරුණු සොයා බලමින් කාර්ය මණ්ඩල සමග දීර්ඝව සාකච්ඡාකර තිබෙනවා.
සෞඛ්ය නියෝජ්ය අමාත්ය වෛද්ය හංසක විඡේමුණි මෙහි දී කියා සිටියේ ජාතික රෝහල සම්බන්ධව දෛනිකව වාර්තා වන ගැටළු වලට අදාළ වන කරුණු සොයා බලා ඒ සඳහා හැකි කඩිනම් විසදුම් ලබාදීම අරමුණු කරගෙන සෞඛ්ය හා ජනමාධ්ය අමාත්ය වෛද්ය නලින්ද ජයතිස්සගේ උපදෙස් මත මෙම හදිසි නිරීක්ෂණය සහ සාකච්ඡාව පැවැත්වීමට කටයුතු කළ බවයි.
ඖෂධ සඳහා වෙනත් වසර වලට වඩා විශාල මුදලක් සහ හදිසි මිල දී ගැනීම් සඳහා ද පෙර වසර වලට වඩා වැඩි මුදලක් වෙන් කළ ද ඖෂධ හිඟ බවට දිගින් දිගටම වාර්තා වන බවත් මීට අමතර උපකරණ ආශ්රිත ගැටළු ද නිතර වාර්තා වන බවත් එම කරුණු පිළිබඳ මෙම සාකච්ඡාවේ දී වැඩි අවධානයක් යොමු කරමින් කරුණු සොයා බැලු බව ද අමාත්යවරයා මෙහි දී පවසා සිටියා.
මෙහි දී විශේෂඥ වෛද්ය, වෛද්ය හෙද ඇතුළු රෝහල් කාර්ය මණ්ඩලය සිය ගැටළු ඉදිරිපත් කළ අතර, නියෝජ්ය අමාත්යවරයා කඩිනම් විසදුම් ලබාදිය හැකි ගැටළු කිහිපයක් සඳහා විසදුම් ලබා දීමට ඒ මොහොතේම පියවර ගෙන තිබෙනවා.
අනෙකුත් කරුණු පිළිබඳව ද ඉතා ගැඹුරින් සොයා බැලු නියෝජ්ය අමාත්යවරයා එම ගැටළු හැකි ආකාරයෙන් අවම කරගනිමින් රෝගී ප්රතිකාර සේවා අඛණ්ඩව පවත්වාගෙන යාම සඳහා ද අවශ්ය උපදෙස් හා මඟ පෙන්වීම් ලබාදීමට කටයුතුකර තිබෙනවා.
