සේවක අර්ථසාධක අරමුදල් වාර්තා නැතිවීම ගැන කෝප් කමිටුවේ අවධානය

ණය පද්ධතියෙන් මකා දැමීම හේතුවෙන් සේවක අර්ථ සාධක අරමුදල් වාර්තා නැතිවීම පිළිබඳ අවධානය
පාර්ලිමේන්තු මන්ත්‍රී මහාචාර්ය රංජිත් බණ්ඩාරගේ සභාපතීත්වයෙන් පසුගියදා රැස්වූ පොදු ව්‍යාපාර පිළිබද කාරක සභාවට (කෝප් කමිටුව) ශ්‍රී ලංකා නිවාස සංවර්ධන මූල්‍ය සංස්ථා බැංකුව (HDFC) කැඳවා
තිබුණා.

එහිදී 2020 සහ 2021 වර්ෂය සදහා විගණකාධිපති වාර්තා හා වර්තමාන කාර්යසාධනය පිළිබඳ පරීක්ෂා කිරීම සිදු වූ බවයි වාර්තා වන්නේ.

ශ්‍රී ලංකා නිවාස සංවර්ධන මූල්‍ය සංස්ථා බැංකුවේ ව්‍යාපාරික ආකෘතිය සම්බන්ධයෙන් කමිටුව ප්‍රශ්න කර තිබෙනවා.

මේ සම්බන්ධයෙන් පැහැදිලිතාවක් නොමැති බව කෝප් කමිටුවේ දී අනාවරණය වූ අතර බැංකුවේ වැඩි කොටස් ප්‍රමාණයක් රාජ්‍ය පාර්ශ්වය සතුව තිබියදීත් බැංකුව සම්බන්ධයෙන් තීන්දු තීරණ ගැනීම සම්බන්ධයෙන් ද පැහැදිලිතාවක් නොපවතින බව මෙහිදී කමිටුව පෙන්වා දුන්නා.

මාස 6ක් ඇතුළත මෙම සංකීර්ණතාව විසඳීමට කටයුතු කරන ලෙස කෝප් කමිටුව උපදෙස් ලබා දුන්නා.

විදුලිබල මණ්ඩලයේ ස්ථාවර තැන්පතුවක් සඳහා වැඩි පොලී අනුපාතයක් ලබාදීම හේතුවෙන් බැංකුවට වූ පාඩුව පිළිබඳ කමිටුවේ අවධානය ද මෙහිදී යොමු වූ බවයි පාර්ලිමේන්තු සන්නිවේදන ඒකකය නිවේදනය කරන්නේ.

2014 නොවැම්බර් 04 දින පැවති කෝප් සභාවේදී මේ පිළිබඳ සාකච්ඡා වී තිබූ අතර සාමාන්‍ය පොලී අනුපාතය ඉක්මවා සිදු වූ මෙම ගෙවීම මගින් බැංකුවට සිදු වී තිබූ පාඩුව රුපියල් මිලියන 69ක්.

මෙහිදී තැරැව්කාර සමාගමක් තුන්වෙනි පාර්ශ්වයක් ලෙස සම්බන්ධවීම පිළිබඳව ද මෙහිදී සාකච්ඡා වූ අතර මෙම තැරැව්කරු බැංකුව පාර්ශ්වයෙන් පැමිණි පුද්ගලයෙක් බව මෙහිදී අනාවරණය වූ බවයි වාර්තා වන්නේ.

එසේම මේ සම්බන්ධයෙන් මැදිහත්වූ පුද්ගලයා සම්බන්ධයෙන් අවවාදාත්මක ලිපියක් පමණක් නිකුත්කර තිබීම පිළිබඳ මෙහිදී කමිටුව පෙන්වාදීම සිදු කෙරුණා.

මේ අනුව මුදල් අමාත්‍යාංශයට මේ සම්බන්ධයෙන් මාසයක් ඇතුළත විශේෂ පරීක්ෂණයක් සිදු කොට මේ සඳහා මැදිහත් වූ තැරැව්කරු සම්බන්ධයෙන් අවශ්‍ය ක්‍රියාමාර්ග ගැනීමට කෝප් කමිටුව නිර්දේශ කර තිබෙනවා.