බොරැල්ල – කොටා පාර ප්‍රදේශයේ පිහිටි සුපිරි වෙළඳසැලක් තුළ කාන්තාවකට සිදුකළ පහරදීමේ සිද්ධිය සම්බන්ධයෙන් කරුණු රැසක් අනාවරණය වී ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව පවසනවා.
මේ සම්බන්ධයන් වන පැමිණිල්ලක් ඊයේ (23) දිනයේ දී පොලීසියට ලැබීමෙන් අනතුරුව පුද්ගලයින් හත්දෙනෙක් අත්අඩංගුවට ගෙන ඇති බවයි පොලිස් මාධ්‍ය ප්‍රකාශකවරයා සඳහන් කළේ.
මෙලෙස අත්අඩංගුවට ගෙන ඇත්තේ අදාළ සුපිරි වෙළඳසැලේ සේවය කළ කාන්තාවන් සිව්දෙනෙක් සහ පිරිමි පුද්ගලයින් තිදෙනෙක් බවයි වාර්තා වුණේ.
මේ අතර පහරකෑමට ලක් වූ කාන්තාව මීට පෙර සුපිරි වෙළඳසැල්වලින් භාණ්ඩ සොරකම් කිරීමේ සිද්ධීන් සම්බන්ධයෙන් චෝදනා ලැබූ තැනැත්තියක් බව වැඩිදුටත් සිදුකළ විමර්ශනවල දී අනාවරණය වී ඇති බවයි ඔහු වැඩිදුරටත් සඳහන් කළේ.
එම කාන්තාව අධික ලෙස මත්ද්‍රව්‍ය භාවිතයට ඇබ්බැහි වී ඇති තැනැත්තියක් බවට ද හඳුනාගෙන ඇති බව පොලිස් මාධ්‍ය ප්‍රකාශකවරයා මාධ්‍යවෙත අදහස් දක්වමින් පැවසුවා.
අදාළ කාන්තාව බොරැල්ල – කොටා පාර ප්‍රදේශයේ පිහිටි සුපිරි වෙළඳසැලෙන් සොරකමක් සිදුකිරීමට ගොස් හසුවීමෙන් පසු මෙම පහරදීම සිදුකර ඇති බවටයි අනාවරණය වී ඇත්තේ.
