කැපුම් තුවාල සහිතව සීදූව, ලියනගේමුල්ල ප්රදේශයේ දී මියගොස් සිටි කාන්තාවගේ අනන්යතාවය මේ වනවිට අනාවරණය කරගෙන තිබෙනවා.
මෙය මනුෂ්ය ඝාතනය බවයි පොලිසිය සඳහන් කළේ.
මෙලෙස ඝාතනයට ලක්ව ඇත්තේ උස්ගොඩ මානගේ තිසාරා මධුවන්ති නැමැති 36 හැවිරිදි එක්දරු මවක් බවයි වාර්තා වන්නේ.
ගාල්ල, නෙළුව, බටහිර බටුවත්ත ප්රදේශයේ පදිංචිකාරිනියක් වන මෙම කාන්තාව සීදුව, ලියනගෙමුල්ල, ජූඩ් මාවත ප්රදේශයේ නේවාසිකාගාරයක තාවකාලිකව පදිංචිව සිට තිබෙනවා.
මෙම කාන්තාව මීට වසර 06 කට පමණ පෙර කටුනායක නිදහස් වෙළෙඳ කළාපයේ සේවය සඳහා පැමිණ ඇති අතර, පසුව ඇය සීදුව සංචාරක හෝටලයක සේවය කරන පුද්ගලයෙකු සමඟ අදාළ නේවාසිකාගාරයේ තාවකාලිකව පදිංචිව සිට ඇති බවයි තොරතුරු වාර්තා වන්නේ.
රාත්රී සමාජ ශාලාවක සිදු වූ සිදුවීමක් මුල්කර ගනිමින් අදාළ හෝටල් සේවකයා සමඟ ඇති කරගත් ආරවුලකින් පසු අද (28) අලුයම ඇය මෙලෙස ඝාතනයට ලක්ව ඇති බවයි පොලිසිය සඳහන් කළේ.
අද (28) අලුයම 02.00 ත් 03.00 ත් අතර කාලයේ දී මෙම කාන්තාව අදාළ පුද්ගලයා සමඟ ලියනගේමුල්ල සාන්ත සෙබස්තියන් දේවස්ථානයේ ඉදිරිපිටින් ගමන් කරන ආකාරය ද ආරක්ෂිත කැමරා දර්ශනවල පටිගතව තිබෙනවා.
මෙම කාන්තාවගේ මුහුණේ කැපුම් තුවාල සහිත මළ සිරුර ලියනගේමුල්ල, කැලෑ පල්ලිය අසල මාර්ගයේ කාණුවක තිබී අද (28) අලුයම සොයාගත් බවයි සීදූව පොලිසිය සඳහන් කළේ.
මීගමුව වැඩබලන මහේස්ත්රාත් ඉන්දික සිල්වා මහතා එම ස්ථානයට පැමිණ ස්ථානීය පරීක්ෂාව සිදු කිරීමෙන් අනතුරුව ඇයගේ සිරුර අධිකරණ වෛද්ය පරීක්ෂණය සඳහා මීගමුව මහ රෝහල වෙත යොමු කරනු ලැබුවා.
මෙම අපරාධයට සම්බන්ධ සැකරුවන් සොයා සීදුව පොලිසියේ නිලධාරී කණ්ඩායමක් විමර්ශන අරඹා තිබෙනවා.
