මඩකළපුව ශික්ෂණ රෝහලේ පෙරේදා (23) අලුයම සිදු වූ කම්පනජනක සිද්ධියක් සම්බන්ධයෙන් මඩකළපුව මූලස්ථාන පොලිසිය විමර්ශන ආරම්භ කර තිබෙනවා.
18 හැවිරිදි උසස් පෙළ සිසුවියක් රෝහලේ වැසිකිළියක් තුළ දී බිළිඳෙකු ප්රසූත කර, එම නවජාත බිළිඳා ජනේලයෙන් ඉවතට විසි කර ඇති බවට චෝදනා එල්ල වී ඇති බවයි දසත අධිකරණ වාර්තාකාරිණිය පැවසුවේ.
ආසන්නයේ සිටි රෝහල් කාර්යය මණ්ඩල සාමාජිකයින්ගේ ඉක්මන් මැදිහත්වීම හේතුවෙන් බිළිඳාව බේරාගැනීමට හැකි වී ඇති බවත් වාර්තා වනවා.
මඩකළපුව ප්රදේශයේ ජීවත් වන, උසස් පෙළ අධ්යාපනය හදාරන 18 හැවිරිදි සිසුවිය පෙරේදා (23) අලුයම 3.30 පමණ බඩේ කැක්කුමක් ඇති බව පවසමින් මඩකළපුව ශික්ෂණ රෝහලට ඇතුළත් කර තිබෙනවා.
කෙසේ වෙතත්, ඇය ගැබ්ගෙන සිටින බව තම පවුලෙන් සහ රෝහල් කාර්ය මණ්ඩලයෙන් සඟවාගෙන ඇති බව පොලිස් වාර්තා පෙන්වා දෙන්නේ.
රෝහල් ප්රතිකාර ලබමින් සිටියදී, අලුයම 5.00 පමණ වන විට සිසුවිය වැසිකිළියට ගොස් ඇති අතර, එහිදී බිළිඳෙකු ප්රසූත කර තිබෙනවා.
පොලිස් වාර්තා අනුව, සිසුවිය එම නවජාත දරුවා ඔසවා ජනේලයෙන් ඉවතට විසි කර ඇති බවයි අනාවරණය වී ඇත්තේ.
ජනේලය පහළින් බිම වැටුණු බිළිඳාගේ හඬ ඇසුණු රෝහල් හෙදියන් කිහිපදෙනෙකු ඉක්මනින් එහි ගොස් බිළිඳා බේරාගෙන ප්රතිකාර සඳහා ඉදිරිපත් කර තිබෙනවා.
මේ වන විට සිද්ධිය සම්බන්ධයෙන් හෙළි වී ඇති තොරතුරු අනුව, විසි කරන ලද බිළිඳා බේරාගෙන ප්රතිකාර සඳහා දැඩි සත්කාර ඒකකයට ඇතුළත් කර ඇති අතර, මව ද දැන් ප්රතිකාර ලබමින් සිටින බව සනාථ වී තිබෙනවා.
මඩකළපුව ශික්ෂණ රෝහලේ අධ්යක්ෂිකා වෛද්ය කලාරංජිනී ගනේසලිංගම් මහත්මිය මාධ්ය වෙත ප්රකාශ කර ඇත්තේ නවජාත දරුවා සහ මව දෙදෙනාම දැන් ආරක්ෂිත තත්ත්වයේ පසුවන බවයි.
“සිද්ධිය වහාම අනාවරණය වූ පසු, අපගේ වෛද්ය කාර්ය මණ්ඩලය ඉතා ඉක්මනින් ක්රියාත්මක වී බිළිඳාට අවශ්ය ප්රතිකාර ලබාදීමට කටයුතු කළා. දැනට බිළිඳා සහ මව දෙදෙනාම සුව අතට පත්වෙමින් පවතිනවා,” යැයි ඇය සඳහන් කළා.
රෝහල් අධ්යක්ෂිකාව කියා සිටියේ මෙවැනි සිද්ධි වැළැක්වීම සඳහා තරුණ ගැහැණු ළමුන් අතර දැනුවත් කිරීමේ වැඩසටහන් වැඩි කිරීමට රෝහල් පරිපාලනය කටයුතු කරන බවත්,මෙවැනි අවදානම් තත්ත්වයන් හඳුනා ගැනීම සඳහා රෝහල් කාර්ය මණ්ඩලයට අමතර පුහුණුවීම් ලබාදීමට කටයුතු කරන බවත්ය.
මඩකළපුව පොලිස් මූලස්ථාන අපරාධ අංශ ස්ථානාධිපති පී. ගජනායක මහතා මාධ්ය වෙත ප්රකාශ කර ඇත්තේ මේ සම්බන්ධයෙන් රෝහල් පොලිසිය විසින් වැඩිදුර පරීක්ෂණ ආරම්භ කර ඇති බවයි.
“මෙය ඉතා සංවේදී සිද්ධියක්. අපි දැනට රෝහල් කාර්ය මණ්ඩලයෙන් ප්රකාශ ලබාගනිමින් සිටිනවා. එමෙන්ම, සිද්ධියට සම්බන්ධ සිසුවියගේ සහ ඇගේ පවුලේ සාමාජිකයින්ගේ ප්රකාශ ද ලබාගැනීමට නියමිතයි. මේ වනවිට මූලික පරීක්ෂණ කටයුතු සිදුකරමින් පවතිනවා,” යැයි ගජනායක මහතා පැවසුවා.
පොලිස් නිලධාරියා වැඩිදුරටත් සඳහන් කළේ මෙවැනි සිද්ධි පිටුපස ඇති සමාජයීය, ආර්ථික සහ මානසික සාධක ගැන ද විධිමත් අධ්යයනයක් සිදු කරන බවයි.
“මෙම සිද්ධිය තනි සිද්ධියක් ලෙස නොව, සමාජයේ තරුණ ප්රජාව මුහුණ දෙන ගැටලු සමුදායක් ලෙස සලකා, ඊට පිළියම් සෙවීමට අවශ්ය පියවර ගැනීමට ද බලාපොරොත්තු වනවා,” යැයි ඔහු ප්රකාශ කර තිබෙනවා.
මෙම සිද්ධිය සම්බන්ධයෙන් අදහස් දැක්වූ මනෝ වෛද්ය විශේෂඥයින් පෙන්වා දෙන්නේ නව යෞවන විවාහ බාහිර ගැබ්ගැනීම් පිටුපස විවිධාකාර සමාජයීය සහ මානසික සාධක ක්රියාත්මක වන බවයි.
මෙම සිද්ධිය පමණක් නොව, පසුගිය වසර කිහිපය තුළ ශ්රී ලංකාව තුළ පාසල් සිසුවියන් සම්බන්ධ ගැබ්ගැනීම් සහ ඒ ආශ්රිත අවාසනාවන්ත සිද්ධි කිහිපයක්ම වාර්තා වී තිබෙනවා.
මෙවැනි සිද්ධි වැඩිවීමත් සමඟ, රජයේ හා රාජ්ය නොවන සංවිධානවල මැදිහත්වීම ද වැඩි වී තිබෙනවා.
අධ්යාපන අමාත්යාංශය හා සෞඛ්ය අමාත්යාංශය එක්ව පාසල් පද්ධතිය තුළ ලිංගික හා ප්රජනන සෞඛ්ය අධ්යාපනය වැඩිදියුණු කිරීමට විවිධ වැඩසටහන් ක්රියාත්මක කරමින් පවතින අතර, මෙරට පාසල් සිසුන් අතර දැනුවත් කිරීමේ වැඩසටහන් ද පවත්වාගෙන යනු ලබනවා.
