සිම්බාබ්වේ කණ්ඩායමට එරෙහිව අද (21) පැවැත්වෙන තුන්වන සහ අවසන් එක්දින තරගයේ ප්‍රථමයෙන් පන්දුවට පහරදුන් ශ්‍රී ලංකා කණ්ඩායම නියමිත පන්දුවාර 50 අවසානයේ කඩුලු 9ක් දැවී ලකුණු 254ක් රැස් කළේය.
තරගයේ කාසියේ වාසිය දිනූ ශ්‍රී ලංකාව ප්‍රථමයෙන් පන්දුවට පහරදීමට තීරණය කර තිබුණි.
ඒ අනුව තරගය ජයගැනීම සඳහා සිම්බාබ්වේ කණ්ඩායමට හිමිවී ඇති ඉලක්කය ලකුණු 255කි.
ශ්‍රී ලංකා කණ්ඩායමේ ආරම්භක පිතිකරුවන් වූ කුසල් මෙන්ඩිස් සහ පැතුම් නිස්සංක පළමු කඩුල්ල වෙනුවෙන් ශක්තිමත් ඉනිමක් ගොඩනැගීමට උත්සාහ කර තිබුණි.
එහෙත් එය අසාර්ථක කරමින් කුසල් මෙන්ඩිස් ලකුණු 36කට දැවී ගියේය.
ඉන්පසුව ශ්‍රී ලංකා කණ්ඩායමේ බලාපොරොත්තුව බවට පත්වූයේ චරිත් අසලංක ය.
ආරක්ෂාකාරී ඉනිමක් ක්‍රීඩා කරමින් ඔහු ශ්‍රී ලංකා ලකුණු පුවරුවට ලකුණු 52ක් එක් කළේය.
හතරේ පහර 06ක් සමගින් පැතුම් නිස්සංක ද සිය අර්ධ ශතකය රැස් කරගත්තේ පන්දු 66කට මුහුණදෙමිනි.
මෙතෙක් පැවති තරග දෙක, කණ්ඩායම් දෙකම එක තරගය බැගින් ජයගෙන තිබේ.
දෙරට අතර 2017 වසරේ පැවති එක්දින තරගාවලිය ද 2-1ක් ලෙස ජයගැනීමට සංචාරක සිම්බාබ්වේ කණ්ඩායම සමත් විය.
එබැවින් අද තරගය ශ්‍රී ලංකා කණ්ඩායමට ඉතා වැදගත් බව ක්‍රිකට් විචාරකයෝ පවසති.
