ස්ත‍්‍රී පුරුෂ සමාජභාවය මත පදනම් වූ ප‍්‍රචණ්ඩත්වය පිටුදැකීමට පාර්ලිමේන්තුව තැඹිලි පැහැ ගැන්වෙයි

ස්ත‍්‍රී පුරුෂ සමාජභාවය මත පදනම් වූ හිංසනය පිටුදැකීම සඳහා වන දින දහසයේ වැඩසටහනට සහාය දක්වමින් පාර්ලිමේන්තුව තුළ වැඩසටහන් රැසක් අද (24) පැවැත් වුණා.

මේ අනුව අග්‍රාමාත්‍ය ආචාර්ය හරිනි අමරසූරිය සහ කතානායක වෛද්‍ය ජගත් වික්‍රමරත්නට ස්ත‍්‍රී පුරුෂ සමාජභාවය මත පදනම් වූ ප‍්‍රචණ්ඩත්වය අවසන් කිරීම සංකේතවත් කරන ලාංඡන පැළඳවීම සිදු කෙරුණා.

අද දින මෙම වැඩසටහනට සහාය පළ කරමින් පාර්ලිමේන්තු මන්ත්‍රීවරියන් මෙන්ම මන්ත්‍රීවරු ද පාර්ලිමේන්තු කාර්ය මණ්ඩලය ද තැඹිලි පැහැති හෝ තැඹිලි පැහැය සහිත ඇඳුමින් සැරසී පැමිණ සිටියා.

පාර්ලිමේන්තු මන්ත්‍රීවරියන්ගේ සංසදය, එක්සත් ජාතීන්ගේ ජනගහන අරමුදලේ (UNFPA) අනුග්‍රහය සහිතව සංවිධානය කළ මෙම වැඩසටහනේ දී පාර්ලිමේන්තුවේ නියෝජ්‍ය කතානායක වෛද්‍ය රිස්වි සාලි, නියෝජ්‍ය කාරක සභා සභාපති හේමාලි වීරසේකර, සභානායක අමාත්‍ය බිමල් රත්නායක, ආණ්ඩු පක්ෂයේ ප්‍රධාන සංවිධායක, අමාත්‍ය වෛද්‍ය නලින්ද ජයතිස්ස සහ විපක්ෂයේ ප්‍රධාන සංවිධායක ගයන්ත කරුණාතිලක යන අය ද සංකේතාත්මක ලාංඡන පැළඳවීම සිදුකෙරුණා.

එසේම සංසදය විසින් පාර්ලිමේන්තුවේ මහලේකම් කුෂානි රෝහණදීර, කාර්ය මණ්ඩල ප්‍රධානී හා නියෝජ්‍ය මහලේකම් චමින්ද කුලරත්න සහ සහකාර මහලේකම් හංස අබේරත්න යන අයට ද ලාංඡන පැළඳවීම සිදුකෙරුණා.

තව ද පාර්ලිමේන්තුවේ මන්ත්‍රී පිවිසුම් දොරටුව අභියසදී සියලුම පාර්ලිමේන්තු මන්ත්‍රීවරුන්ට ද ස්ත‍්‍රී පුරුෂ සමාජභාවය මත පදනම් වූ ප‍්‍රචණ්ඩත්වය අවසන් කිරීමට සහය පළ කිරීමේ ලාංඡන පැළඳවීම සිදුවුණා.

දින දහසයේ වැඩසටහන යනු නොවැම්බර් 25 දින සිට දෙසැම්බර් 10 වැනි දින දක්වා ස්ත්‍රී පුරුෂ සමාජභාවය මත පදනම් වූ හිංසනයට (GBV) එරෙහිව වාර්ෂිකව පැවැත්වෙන ගෝලීය ව්‍යාපාරයක්.

එය කාන්තාවන්ට එරෙහි හිංසනය තුරන් කිරීමේ ජාත්‍යන්තර දිනයෙන් ආරම්භ වී මානව හිමිකම් දිනයෙන් අවසන් වනවා.

මෙම වැඩසටහනේ අරමුණ වන්නේ ගෝලීය වශයෙන් කාන්තාවන්ට සහ ගැහැණු ළමයින්ට එරෙහි හිංසනය වැළැක්වීම සහ තුරන් කිරීම් සඳහා දැනුවත් කිරීම සහ ක්‍රියාමාර්ග ගැන්වීම සඳහා ශක්තිමත් කිරීමයි.

එක්සත් ජාතීන්ගේ මහලේකම්වරයා විසින් ප්‍රකාශයට පත්කරන ලද දින දහසයේ වැඩසටහනේ 2025 ගෝලීය තේමාව මගින් අවධාරණය කර ඇත්තේ “සියලුම කාන්තාවන්ට සහ ගැහැණු ළමයින්ට එරෙහි ඩිජිටල් හිංසනය අවසන් කිරීම සඳහා එකතු වන්න” යන්නයි.

මෙයට සමගාමීව කාන්තා මන්ත්‍රීවරියන්ගේ සංසදය විසින් විශේෂ මාධ්‍ය හමුවක්ද පවත්වනු ලැබුවා.

එහිදී පාර්ලිමේන්තු මන්ත්‍රීවරියන්ගේ සංසදය නියෝජනය කරමින්, හරිනි අමරසූරිය අග්‍රාමාත්‍යවරිය පවසා සිටියේ මෙවර තේමාව වන සියලුම කාන්තාවන්ට සහ ගැහැණු ළමයින්ට එරෙහිව ඩිජිටල් අවකාශය තුළ සිදුවන හිංසනය අවසන් කිරීම සම්බන්ධයෙන් සියලු දෙනා විශේෂ අවධානයක් යොමු කළ යුතු බවයි.

එසේම නීති ප්‍රතිපත්ති සෑදීමෙන් ඔබ්බට ගිය සමාජ වගකීමක් සහ අවධානයක් ස්ත‍්‍රී පුරුෂ සමාජභාවය මත පදනම් වූ හිංසනය පිටුදැකීම සඳහා අවශ්‍ය බවත් ඇය පෙන්වා දුන්නා.

මෙවර පාර්ලිමේන්තුවේද කාන්තා නියෝජිතයන් ගණන 22 ක් දක්වා වැඩිවීම සාධනීය තත්ත්වයක් බවත් ඒ අනුව ස්ත‍්‍රී පුරුෂ සමාජභාවය මත පදනම් වූ හිංසනය පිටුදැකීම සමාජගත කිරීම සඳහා පාට පක්ෂ භේදයකින් තොරව සියලු දෙනා එක්වන ලෙසත් ඇය ඉල්ලීමක් කළා.

පාර්ලිමේන්තු මන්ත්‍රීවරියන්ගේ සංසදයේ සභාපති සහ කාන්තා හා ළමා කටයුතු ගරු අමාත්‍ය සරෝජා සාවිත්‍රි පෝල්රාජ් පවසා සිටියේ ලෝකයේම කාන්තාවන් මිලියන 315ක් 2024 වසරේදී ලිංගික හිංසනයට ලක්ව ඇති බවයි.

ශ්‍රී ලංකාව තුළ ද මෙය සිදුවන බවත් විශේෂයෙන් ඩිජිටල් අවකාශය තුළ දේශපාලනය ඇතුළු සෑම ක්ෂේත්‍රයකම කාන්තාවන්ට සහ ගැහැණු දරුවන්ට මුහුණදීමට සිදුවන අපයෝජන ගණන ඉහළ ගොස් ඇති බවත් ඇය පැවසුවා.

ඒ අනුව උත්තරීතර පාර්ලිමේන්තුව තුළ ද මන්ත්‍රීවරියන් ද වාචිකව හෝ හිංසනයට ලක්වීම වැළැක්වීම සඳහා ස්ථාවර නියෝග වෙනස් කිරීමට යෝජනාවක් කතානායකවරයාට භාරදීමට පාර්ලිමේන්තු මන්ත්‍රීවරියන්ගේ සංසදය අපේක්ෂා කරන බවත් ඇය පැවසුවා.

ඒ අනුව ස්ත‍්‍රී පුරුෂ සමාජභාවය මත පදනම් වූ හිංසනය පිටුදැකීම සඳහා පළමු ආදර්ශය උත්තරීතර පාර්ලිමේන්තුව ලෙස රටට ලබාදීමට කටයුතු කරන බවත් අමාත්‍යවරිය වැඩිදුරටත් සඳහන් කළා.

දේශපාලනයේදී කවර මතවාද දැරුවත් ස්ත‍්‍රී පුරුෂ සමාජභාවය මත පදනම් වූ හිංසනය පිටුදැකීම සඳහා සියලු දෙනාට එක්වන ලෙස ඇය ආරාධනා කළා.

මෙහිදී අදහස් දැක්වූ පාර්ලිමේන්තු මන්ත්‍රීවරියන්ගේ සංසදයේ නියෝජ්‍ය සම සභාපතිනි පාර්ලිමේන්තු මන්ත්‍රිනි චමින්ද්‍රානි කිරිඇල්ල පවසා සිටියේ ස්ත‍්‍රී පුරුෂ සමාජභාවය මත පදනම් වූ හිංසනය පිටුදැකීම එක්සත් ජාතීන්ගේ එක්සත් ජාතීන්ගේ ජනගහන අරමුදල (UNFPA) සහ එක්සත් ජාතීන්ගේ කාන්තා වැඩසටහන (UN women) මගින් සිදුකළ සමීක්ෂණයකට අනුව කාන්තාවන්, ගැහැණු ළමයින් ඇතුළු සියලු පුද්ගලයන් නිතර විවිධ ආකාරයේ අන්තර්ජාල හිංසනවලට මුහුණ දෙන බව හෙළි වී ඇතිබවයි.

ඒ, අනුව ව්‍යාජ පුද්ගල අනන්‍යතාවයන් නිර්මාණය 36.9% ක් බවත්, අසභ්‍ය තොරතුරු/වීඩියෝ බෙදා හැරීම 36.9% ක් බවත් ඇය ‍සඳහන් කළා.

ශ්‍රී ලංකාවේ කාන්තාවන් පස්දෙනෙකුන් එක් අයෙකු ශාරීරිකව හෝ වාචිකව ලිංගික හිංසනයට පත්වන බවත් එම තත්ත්වය වෙනස් කොට යහපත් සමාජයක් නිර්මාණය කිරීම සඳහා සියලු දෙනා පාට පක්ෂ භේදයකින් තොරව කටයුතු කළ යුතු බවත් ඇය අවධාරණය කළා.

එසේම මෙම වැඩසටහන ශ්‍රී ලංකා පාර්ලිමේන්තුව තුළ ක්‍රියාත්මක කිරීමට එක්වීම සම්බන්ධව එක්සත් ජාතීන්ගේ ජනගහන අරමුදලට (UNFPA) ඇය සිය ස්තූතිය පළ කර සිටියා.