රට තුළ සහල් හා වී හිඟයක් ඇති බව පවසමින් සහල් ආනයන කිරීම මඟින් දේශිය ගොවියාට සහ වී මෝල් හිමියන්ට දැඩි තර්ජනයක් එල්ල වී ඇති බව එක්සත් සහල් නිෂ්පාදකයන්ගේ සංගමයේ සභාපති මුදිත් පෙරේරා පවසනවා.
පොළොන්නරුවේදී මාධ්‍ය හමුවක් කැඳවමින් ඔහු මේ බව සඳහන් කළා.
ඔහු මෙහිදී වැඩිදුරටත් සඳහන් කළේ 2021 වර්ෂයේදී සහල් අනයනය කිරීමේ දී සහල් කිලෝවකට රුපියල් 50කව තිබූ බද්ද ශත විසිපහට අඩුකිරීම හේතුවෙන් රට තුළට අනවශ්‍ය අයුරින් සහල් ආනයනය කර ඇති බවයි.
දේශිය වෙළඳපොළේ විදේශිය සහල් අඩුමිලකට අලෙවි කිරීමත් සමඟ දේශියව නිෂ්පාදනය කරන සහල් අලෙවි නොවන බවයි ඔහු පෙන්වා දෙන්නේ.
එලෙස දේශීය සහල් අලෙවිය අඩුවීමත් සමඟ රටපුරා සහල් මෝල් රැසක් මේවන විටත් වසා දැමීමට සිදුව ඇති බව සභාපතිවරයා මෙහිදී සඳහන් කර සිටියා.
රටතුළ ඇති වී මෝල් දහසෙන් 750ක් පමණ මේ වනව්ට වැසී ගොස් ඇති බවයි ඔහු වැඩිදුරටත් සඳහන් කර සිටියේ.
සහල් අනයනය නතර කර දේශිය ගොවියාගේ වගාවට අවශ්‍ය යෙදුම් සියල්ල රජයේ මැදිහත්වීම මත ලබා දී දේශිය සහල් මිල අඩුකර පාරිභෝගිකයාට සහන ලබාදිය හැකි බවයි ඔහු පෙන්වා දෙන්නේ.
හුදෙක් පෞද්ගලික ලාභ අරමුණු කරගනිමින් විදෙස් රටවලින් මෙරටට සහල් අනයනය සිදුකරන බවයි එක්සත් සහල් නිෂ්පාදකයන්ගේ සංගමයේ සභාපති මුදිත් පෙරේරා මෙහිදී සඳහන් කළේ.
