සහන කණ්ඩායම් සඳහා පොලිසියෙන් විශේෂ නිවේදනයක්

ආපදාවට පත් වූවන්ට සහන සැලසීම සඳහා දායකත්වය ලබාගෙන සහය කණ්ඩායම් සඳහා ආපදාවට පත් වූ ප්‍රදේශවලට ප්‍රවේශවීමේ ක්‍රියාවලිය විධිමත් කිරීමට ශ්‍රී ලංකා පොලිස් මූලස්ථානයේ ස්ථාපිත කර තිබෙන විශේෂ මෙහෙයුම් මැදිරිය හා සම්බන්ධ වන ලෙස පොලිස් මාධ්‍ය ප්‍රකාෂකවරයා සහාය කණ්ඩායම්වලින් ඉල්ලා සිටිනවා.

ඇතැම් සහය කණ්ඩායම් විසින් ආපදාවට පත්වූවන් සඳහා ලබාදෙන වියලි ආහාර, පිසූ ආහාර ඇතුළු සහනාධාර ද්‍රව්‍ය විපතත් පත් වූවන්ට ලබා දීමේදී යම් යම් බාධාවක් සහ ප්‍රමාදයන් නිරීක්ෂණය වන බවයි පොලිස් මාධ්‍ය ප්‍රකාශකවරයා සඳහන් කළේ.

එමෙන්ම ආපදාවට ලක්වූ ප්‍රදේශවල මාර්ග පිළිසකර කරමින් තිබිය දී විශාල වශයෙන් සහන කණ්ඩායම් පැමිණීමද එම කාර්යයට බාධාවක් වී ඇති බවයි පැවසෙන්නේ.

ඒ අනුව එම තත්ත්වයන් කළමනාකරණය සඳහා පොලිසිය විසින් පිහිටුවා ඇති විශේෂිත මෙහෙයුම් මැදිරිය සමඟ සම්බන්ධ වීමට විශේෂිත දුරකථන අංක 04ක් පොලිසිය විසින් හඳුන්වා දී තිබෙනවා.

071 859 58 84, 071 859 58 83, 071 859 58 82, 071 859 58 81, 071 859 58 80 යන දුරකථන අංක ඔස්සේ විශේෂ මෙහෙයුම් මැදිරිය සමඟ සම්බන්ධ වීමේ හැකියාව පවතිනවා.

එමෙන්ම ආපදා සහන කණ්ඩායම් ආපදාවට ලක් වූ ප්‍රදේශවලට ළඟා වීමේදී ඔවුන්ගේ ආරක්ෂාව තහවුරු කිරීම් සඳහා ද පොලිසිය බැඳී සිටින බවයි පොලිස් මාධ්‍ය ප්‍රකාශක, සහකාර පොලිස් අධිකාරි එෆ්. යූ. වුට්ලර් මහතා සඳහන් කර සිටියේ.