සරන ගුණවර්ධන නිදහස්

සංවර්ධන ලොතරැයි මණ්ඩලයේ හිටපු සභාපතිවරයා ලෙස කටයුතු කළ සරන ගුණවර්ධන නිදහස් කර තිබෙනවා.

අද පෙරවරුවේ විත්තිකාර පාර්ශ්වය අධිකරණයට ඉදිරිපත් කිරීමෙන් අනතුරුව නිදහස් කරන ලෙසටයි කොළඹ මහාධිකරණ විනිසු නාමල් බණ්ඩාර බලල්ලේ නියෝග කළේ.

හිටපු රාජ්‍ය අමාත්‍යවරයෙකු ද වන සරන ගුණවර්ධනට චෝදනා එල්ල වී තිබුණේ; ඔහු සංවර්ධන ලොතරැයි මණ්ඩලයේ සභාපතිවරයා වශයෙන් කටයුතු කරන සමයේ දී මණ්ඩලයට කුලී පදනම මත වාහන ලබා ගැනීමේ දී රුපියල් ලක්ෂ 28ක මුදලක් රජයට පාඩු කළ බවටයි.

මෙම චෝදනාව එල්ල කරමින් සරන ගුණවර්ධනට එරෙහි ව අල්ලස් හෝ දූෂණ විමර්ශන ඒකකය විසින් නඩු පවරනු ලැබුවා.

කෙසේවෙතත් නඩුව අද කැඳවූ අවස්ථාවේ දී විත්තියේ නීතිඥවරුන් මතු කළ මූලික විරෝධතා හේතුවෙන් නඩුකරය තවදුරටත් ඉදිරියට පවත්වාගෙන යාමට නොහැකි බවටයි මහාධිකරණ විනිසුරුවරයා තීරණය කළේ.

2005 වර්ෂයේ සිය 2007 වර්ෂය දක්වා කාලය තුළ සංවර්ධන ලොතරැයි මණ්ඩලයේ සභාපතිවරයා ලෙස කටයුතු කළ කාලයේ දූෂණය නමැති වරදට වසර 03කට සිර දඬුවම් නියම වුණු සරණ ගුණවර්ධනට ඇප හිමිවූයේ2020 ජනවාරි මස 07 වැනි දිනයි.

එම ඇප හිමිවීම ද සිදු වූයේ කොළඹ ප්‍රධාන මහේස්ත්‍රාත් අධිකරණය යටතේ යි.

එසේ ඇප හිමිවීමෙන් අනතුරුව ද මෙම නඩුව දීර්ඝ ලෙස කැඳවමින් විභාග කෙරුණු අතර, අද දිනයේ දී විත්තිකාර පාර්ශ්වය නිදහස් කරන ලෙසටයි මහාධිකරණය විසින් නියෝග කරනු ලැබුවේ.