සණස මාධ්‍ය ජාලය විසින් සණස ව්‍යාපාරයේ සමුපකාර මූලධර්ම ප්‍රවර්ධනය කිරීම සඳහා SANASA සිංහල සඟරාව නිල වශයෙන් එළිදැක්වීමේ උත්සවය ඊයේ (29) පැවැත්වුණා.
ඒ බත්තරමුල්ල වෝටර්ස් එජ් පරිශ්‍රයේ දියි.
ජාතික හා ජාත්‍යන්තර තලයේ සමුපකාර සංවර්ධනය, ව්‍යවසායකත්වය සහ ආර්ථික පරිවර්තනය පිළිබඳ සාකච්ඡා පෝෂණය කිරීම මෙම සඟරාවේ අරමුණයි.
සණස ආකෘතියේ සාර්ථකත්වය ඉස්මතු කිරීමෙන්, SANASA ග්‍රාමීය ආර්ථිකයක් නඟා සිටුවීමේ දී සමුපකාරවල බලය පිළිබඳ ව දැනුවත් කිරීම සණස සමූහයේ ඒකායන පරමාර්ථය බවත් සඳහන් වනවා.
සමුපකාර පුවත්පත් කලාවේ නව සන්ධිස්ථානයක් සනිටුහන් කිරීම සඳහා මෙදින සණස නායක විශ්ව ප්‍රසාදිනී ආචාර්‍ය පී. ඒ. කිරිවන්දෙනිය මහතාගේ මූලිකත්වයෙන් ප්‍රධාන ආරාධනය පිළිගෙන ලංකාදීප පුවත්පතේ හිටපු ප්‍රධාන කර්තෘ සහ කර්තෘ මණ්ඩල අධ්‍යක්ෂ සිරී රණසිංහ මහතා සහභාගී වූ අතර මේ අවස්ථාව සඳහා සණස සමූහයේ ආයතන 14 හි නිලධාරීන් හා විද්වත් වෘත්තිකයන් රැසක් සහභාගී වූ බවත් වාර්තා වනවා.
මහාචාර්ය ඩබ්ලිව්. ඩී. ලක්ෂ්මන් මහතා, ඩියෝ උපාය මාර්ගික උපදේශන ආයතනයේ ප්‍රධාන විධායක නිලධාරි ඩෙන්සිල් ඉන්ද්‍රජිත් පෙරේරා මහතා, සණස ඉන්ටර්නැෂනල් පුද්ගලික සමාගමේ කළමනාකාර අධ්‍යක්ෂිකා සාමදානි කිරිවන්දෙනිය මහත්මිය සහ එම සඟරාවේ ප්‍රධාන කර්තෘ කුල ශ්‍රී කාරියවසම් ඇතුළු ක්ෂේත්‍රයේ ගෞරවනීය විශේෂඥයින් සහභාගී වූ අර්ථවත් සංවාදමය වැඩසටහනක් පැවැත්වීම මෙම උත්සවයේ විශේෂ අවස්ථාවක් වුණා.
ශ්‍රී ලංකාවේ මූල්‍ය හා සමාජීය අංශ ශක්තිමත් කිරීම සඳහා ප්‍රධාන කාර්යභාරයක් ඉටු කර ඇති සණස ව්‍යාපාරයේ මුලපිරීමක් ලෙස, මෙම සඟරාව දේශීය හා ජාත්‍යන්තර විශේෂඥයින්ගේ තීක්ෂණ බුද්ධිය සම්ප්‍රේෂණය කරන වේදිකාවක් ලෙස ජන හදවත් පෝෂණය කරනු ඇතයි අප බලාපොරොත්තුවක් වනවා.
සමුපකාර සංවර්ධනයේ අනාගතය හැඩ ගැස්වීමට අපේක්ෂා කරන ප්‍රකාශනයක් වන සණස හි සම්ප්‍රාප්තිය මෙලෙස සනිටුහන් කරමින් එක් වූ සියලු දෙනා වෙත සණස මාධ්‍ය ජාලයේ විශේෂ ස්තුතිය ද පුද කර තිබෙනවා.
