ලෝකයේ මහාද්වීප හතේ උසම කඳු මුදුන් තරණය කර, ඒවායේ ශ්‍රී ලංකා ජාතික ධජය එසවීම තම එකම බලාපොරොත්තුව සහ අභිලාෂය බව ශ්‍රී ලාංකික කඳු තරණය කරන්නෙකු වන යොහාන් පීරිස් මහතා පවසනවා.
අද (05) අලුයම කටුනායක ගුවන් තොටුපොළේ දී මේ බව කියා සිටියේ ඇන්ටාටිකාවේ උසම කඳු මුදුන වන මීටර් 4,690ක් උස මවුන්ට් වින්සන්ට් තරණය කිරීම දිවයිනෙන් පිටත් ව යමින්.
ඔහු මේ වනවිට ොස්ට්‍රෙලියාවේ කොසිඔස්කෝ, අප්‍රිකාවේ කිලිමැන්ජාරෝ, යුරෝපයේ එල්බ්‍රෙස් සහ ආසියාවේ එවරස්ට් යන කඳු 04 ම සාර්ථකව තරණය කර තිබෙනවා.
මීට අමතරව ආජින්ටිනාවේ ඇකන්කගුවා සහ ඇලෙස්කාවේ මවුන්ට් දිනාලි කඳු මුදුන් තරණය කිරීමට ඔහුට තවදුරටත් ඉතිරි වී පවතින බවයි හෙතෙම පැවසුවේ.
මෙම කඳු මුදුන් 07 ම සාර්ථක ව තරණය කළ ලෝකයේ කඳු නගින්නන් 350 දෙනෙකු සිටින බව ද, තමා ද ඔවුන් අතරට එක් වී ශ්‍රී ලංකාවට කීර්තිය රැගෙන ඒමට බලාපොරොත්තුවෙන් මෙම කඳු තරණය කිරීම සිදු කරන බව ද යොහාන් මහතා සඳහන් කළා.
යොහාන් පීරිස් කොළඹ – බොරැල්ල ප්‍රදේශයේ පදිංචි 50 හැවිරිදි රූපලාවණ්‍ය ශිල්පියෙක්.
ඔහු මමෙවර කඳු තරණය කිරීමට අද අලුයම 04.15ට කටාර් ගුවන් සේවයේ කිව්.ආර්.- 663 දරන ගුවන් යානයෙන් දෝහා වෙත ගොස් , එතැන් සිට වෙනත් ගුවන් යානයකින් ඇන්ටාටිකාව බලා පිටත්ව යාමට නියමිතයි.
