මේ වනවිට වැඩබලන ජනාධිපති ධුරයේ කටයුතු කරන රනිල් වික්‍රමසිංහ හමුවීමට සමඟි ජනබලවේග නියෝජනය කරන ප්‍රබල පාර්ලිමේන්තු මන්ත්‍රීවරුන් සිව්දෙනෙක් ගොස් ඇති බවට තොරතුරු වාර්තා වනවා.
ඊයේ (17) දිනයේ දී මෙම හමුව සිදුව ඇති බවයි දේශපාලන ආරංචි මාර්ග සඳහන් කළේ.
කබීර් හෂීම්, ආචාර්ය හර්ෂ ද සිල්වා, එරාන් වික්‍රමරත්න සහ හර්ෂණ රාජකරුණා එලෙස වැඩබලන ජනාධිපතිවරයා හමු වී සකච්ඡාකර ඇති බවයි තොරතුරු වාර්තා වුණේ.
රනිල් වික්‍රමසිංහ යටතේ ඉදිරියේ දී පිහිටුවනු ලබන ආණ්ඩුවක ප්‍රබල අමාත්‍ය ධුර දෙකක් මෙම සිව්දෙනා අතරින් දෙදෙනෙක් විසින් ඉල්ලා ඇති බවයි දේශපාලන ආරංචි මාර්ග වැඩිදුරටත් සඳහන් කළේ.
මෙලෙස ඉල්ලා ඇති අමාත්‍යාංශ දෙක වන්නේ මුදල් අමාත්‍යාංශය සහ කර්මාන්ත අමාත්‍යාංශයයි.
ගෝඨාභය රාජපක්ෂ ජනාධිපතිවරයා ජනධිපති ධුරයෙන් ඉවත්වීමත් සමඟ අනුප්‍රාප්තික ජනාධිපතිවරයෙකු පත්කර ගැනීමට අදාල ඡන්ද විමසීම ලබන 20 වනදා පාර්ලිමේන්තුවේ දී සිදුකෙරෙනවා.
ඒ සඳහා මේ වනවිටත් අපේක්ෂකයින් සිව්දෙනෙක් තරග කරන බවට නිල වශයෙන් ප්‍රකාශකර අවසන්.
මේ වනවිට වැඩබලන ජනාධිපති ධුරයේ කටයුතු කරන රනිල් වික්‍රමසිංහ, සමඟි ජනබලවේගයේ නායක සජිත් ප්‍රේමදාස, ජාතික ජනබලවේගයේ නායක අනුර කුමාර දිසානායක සහ පොදුජන පෙරමුණේ පාර්ලිමේන්තු මන්ත්‍රී ඩලස් අලහප්පෙරුම ඒ හතරදෙනායි.
