සංජු සැම්සන්ගෙන් 20-20 පිටියේ සුපිරි වාර්තාවක්

ජාත්‍යන්තර 20-20 පිටියේ ඉන්දියාව වෙනුවෙන් දෙවන වේගවත්ම ශතකය රැස්කළ පිතිකරුවා බවට පත් වන්නට සංජු සැම්සන්ට අද (12) හැකියාව ලැබුණා.

සංචාරක බංගලාදේශය සමඟ හයිද්‍රාබාද් හිදී මේ වනවිට පැවැත්වෙන තුන්වන විස්සයි විස්ස තරගයේ දී ඔහු මෙම ශතකය රැස් කළා.

සංජු සැම්සන් මෙම ශතකය වාර්තා කළේ පන්දු 40 කට මුහුණ දෙමින්.

මීට පෙර ඉන්දියාව වෙනුවෙන් වේගවත්ම විස්සයි විස්ස ශතකය රෝහිත් ශර්මා පන්දු 35ක් තුළ වාර්තාකර තිබෙනවා.

සංජු සැම්සන් මෙම තරගයේ දී පන්දු 22කදී සිය අර්ධ ශතකය සම්පුර්ණ කළ අතර, ශතකයට අවශ්‍ය ඉතිරි ලකුණු 50 රැස් කිරීමට ඔහු වැය කළේ පන්දු 18ක් පමණයි.

මේ අතර සංජු සැම්සන් අද දිනයේ බංගලාදේශයට එරෙහිව රැස්කළ ශතකය වාර්තා අතරට එක්වනේ ජාත්‍යන්තර 20-20 පිටියේ වාර්තා වූ 12 වන වේගවත්ම ශතකය ලෙසටයි.

සංජු සැම්සන් මෙම තරගයේ දී පන්දු 47කට මුහුණ දෙමින් ලකුණු 111ක් රැස්කළ අතර, ඔහුගේ මෙම ප්‍රවේගකාරී ඉනිමට හයේ පහර 08ක් සහ හතරේ පහර 11ක් ඇතුළත්.

මෙහිදී රිෂාඩ් හොසේන් යැවූ ඉන්දීය ඉනිමේ 10 වන පන්දුවාරයට පිට පිට හයේ පහර 05ක් එල්ල කිරීමට ද සැම්සන් සමත් වෙනවා.