නියෝජ්ය කථානායක (වෛද්ය) රිස්වි සාලි මහතාගේ නායකත්වයෙන් යුත් මෙරට පාර්ලිමේන්තු නියෝජිත පිරිසක් මැයි 25 සිට 31 දක්වා ඉන්දියාවේ
පැවති ධාරිතා සංවර්ධන වැඩසටහනකට සහභාගී වුණා.
පාර්ලිමේන්තු සන්නිවේදන පියස නිවේදනය කළේ, ශ්රී ලංකාවේ ඉන්දීය මහ කොමසාරිස් සන්තෝෂ් ජා මහතා විසින් කරන ලද ආරාධනයකට
අනුව, මෙම වැඩසටහන ලෝක් සභා ලේකම් කාර්යාලයේ පාර්ලිමේන්තු අධ්යයන හා පුහුණු කාර්යාංශය (BPST) විසින් සංවිධානය කරන ලද බවයි.
නියෝජිත පිරිසට නියෝජ්ය කාරක සභා සභාපති පාර්ලිමේන්තු මන්ත්රිනි හේමාලි වීරසේකර , සභාගර්භයේ සභාපති මණ්ඩලය නියෝජනය
කරන පාර්ලිමේන්තු මන්ත්රීවරු, රජයේ ගිණුම් පිළිබඳ කාරක සභාවේ (COPA) සහ පොදු ව්යාපාර පිළිබඳ කාරක සභාවේ (COPE) සභාපතිවරු, රජය සහ විපක්ෂය නියෝජනය කරන මන්ත්රීවරු පිරිසක් මීට ඇතුළත්.
පාර්ලිමේන්තුවේ මහලේකම් කුෂානි රෝහණදීර මහත්මිය සහ පාර්ලිමේන්තු මහ ලේකම් කාර්යාලයේ ජ්යෙෂ්ඨ නිලධාරීන් පිරිසක් ද මෙම වැඩසටහනට
එක් වූ බවයි වාර්තා වන්නේ.
මැයි 26 වන දින නවදිල්ලියේ පාර්ලිමේන්තු පුස්තකාල ගොඩනැගිල්ලේ පැවති පිළිගැනීමේ උත්සවයක් සහ දැනුවත් කිරීමේ සැසියක් සමඟ වැඩසටහන ආරම්භ වුණා.
අනතුරුව ලෝක් සභාව, රාජ්ය සභාව, ඇතුළු වැදගත් ස්ථාන දැකබලා ගැනීමට ද පිරිස එක්වූ අතර ඉන්දියානු පාර්ලිමේන්තු ප්රජාතන්ත්රවාදයේ ආයතනික හා ඓතිහාසික වැදගත්කම පිළිබඳව එහිදී හඳුන්වාදීම සිදු කළා.
ඉන්දියානු පාර්ලිමේන්තුවේ මූල්ය කාරක සභා පිළිබඳව දැනුවත් කිරීමකට නියෝජිත පිරිස එක් වුණා.
ඒකාබද්ධ ලේකම් ශ්රී එච්. රාම් ප්රකාශ් සහ ව්යවස්ථාදායක සේවා අධ්යක්ෂ ශ්රී මුරලීධරන් පී. විසින් මෙහෙයවන ලද මෙම සැසිය, මූලික මූල්ය කාරක සභා, විශේෂයෙන් ජ්යෙෂ්ඨ විපක්ෂ නායකවරයාගේ සභාපතිත්වයෙන් යුත් රාජ්ය ගිණුම් කාරක සභාව (PAC) පිළිබඳව හඳුන්වාදීම සිදු කළා.
