ශ්රී ලංකා ප්රජාතාන්ත්රික සමාජවාදී ජනරජයේ 10 වැනි පාර්ලිමේන්තුවේ මංගල සැසි වාරය මීට ටික වේලාවකට (21) පෙර ආරම්භ කෙරුණා.
පසුගියදා මහමැතිවරණයෙන් තේරී පත් වූ මහජන නියෝජිතයින් 225 දෙනෙකු අද දිනයේ දී පාර්ලිමේන්තුව නියෝජනය කරනු ඇති.
පාර්ලිමේන්තුවට පැමිණි සියලුම මන්ත්රීවරුන් ව පාර්ලිමේන්තු මහලේකම් කුෂානි රෝහණධීර මහත්මිය විසින් පිළිගනු ලැබුවා.
මේ අතර නව පාර්ලිමේන්තුවේ කතානායකවරයා වශයෙන් ආචාර්ය අශෝක සපුමල් රංවල මහතා තේරීපත් වුණා.
ඒ මහතාගේ නම අග්රාමාත්ය ආචාර්යය හරිනි අමරසූරිය විසින් යෝජනා කරන ලද අතර ස්ථීර කිරීම අමාත්ය විජිත හේරත් මහතා විසින් සිදු කරනු ලැබුවා.
ඉන් අනතුරුව නව කතානායකවරයා සිය ධුරයේ දිවුරුම් දීම සහ භාරගැනීම සිදු කෙරුණා.
අද පෙරවරු 9.55 ට ගණපූර්ණ සීනුව නාද කිරීමෙන් අනතුරුවයි පාර්ලිමේන්තුව පෙ.ව. 10.00 ට රැස්වීම සිදු වූයේ.
සෙංකෝලය සභා ගර්භයේ තැන්පත් කිරීමෙන් පසු, පාර්ලිමේන්තුව රැස් වන දිනය හා වෙලාව නියම කරමින් ජනාධිපතිවරයා විසින් නිකුත් කරන ලද අති විශේෂ ගැසට් නිවේදනය පාර්ලිමේන්තුවේ මහ ලේකම්වරිය විසින් දිනයේ පළමු කාර්යය ලෙස සභාවට ඉදිරිපත් කළා.
පළමුව කථානායකවරයා තෝරා ගැනීම සිදුවෙන අතර ආණ්ඩුක්රම ව්යවස්ථාවේ 64 (1) ව්යවස්ථාව සහ පාර්ලිමේන්තු ස්ථාවර නියෝග 4,5 සහ 6 හි විධිවිධාන ප්රකාරව අනුපිළිවෙලින් කථානායකවරයා තෝරා පත්කර ගැනීම, කථානායක නිල ප්රතිඥාව හෝ දිවුරුම ලබා දීම, මන්ත්රීවරයන් විසින් නිල ප්රතිඥාව හෝ දිවුරුම ලබා දීම, නියෝජ්ය කථානායක සහ නියෝජ්ය කාරකසභා සභාපති තෝරා පත් කරගැනීම සිදු කරනු ලබනවා.
පළමු දිනයේදී මන්ත්රීවරයන් සඳහා අසුන් පැනවීමේ පිළිවෙළක් නැහැ.
තමන්ට රිසි අසුනක අසුන් ගැනීමේ අවස්ථාව මන්ත්රීවරයන්ට හිමිවීම විශේෂත්වයක්.
මෙම මූලික කටයුතු අවසානයේ පාර්ලිමේන්තුව තාවකාලිකව අත්හිටුවීම සිදුවන අතර ආණ්ඩුක්රම ව්යවස්ථාවේ 32(4) සහ 33 ව්යවස්ථාවල විධිවිධාන ප්රකාරව පෙ.ව. 11.30 ට ජනාධිපති අනුර කුමාර දිසානායක මහතා සභාවේ මුලසුනේ සිට ආණ්ඩුවේ ප්රතිපත්ති ප්රකාශය පාර්ලිමේන්තුවට ඉදිරිපත් කිරීමට නියමිතයි.
දසවැනි පාර්ලිමේන්තුවේ මංගල සභා රැස්වීම චාම් උත්සවයක් ලෙස පැවැත්වීමට ජනාධිපතිවරයාගේ උපදෙස් මත කටයුතු යොදා ඇති බවත් ඒ අනුව ජය මංගල ගාථා, ත්රිවිධ හමුදා උත්තමාචාර, ආචාර වෙඩි මුර සහ රථ පෙළපාලි නොපැවැත්වෙන බවත් පාර්ලිමේන්තුවේ වේත්රධාරී කුෂාන් ජයරත්න මහතා ප්රකාශ කළා.
මේ අනුව පෙ.ව. 11.00 පමණ වන විට සියලු ආරාධිතයන් අසුන් ගැනීමට නියමිත අතර පෙ.ව. 11.10 ට පාර්ලිමේන්තු ගොඩනැගිල්ලේ ප්රධාන පියගැට පෙළ අසල දී පාර්ලිමේන්තුවේ කථානායකවරයා පිළිගැනීමට නියමිතයි.
අනතුරුව පෙ.ව. 11.15 ට අග්රාමාත්යවරිය පිළිගැනීම සිදුවන අතර ජනාධිපතිවරයාගේ පැමිණීම සිදුවන්නේ ඉන් අනතුරුවයි.
ඒ අනුව පෙ.ව. 11.20 ට කථානායකවරයා සහ පාර්ලිමේන්තුවේ මහ ලේකම් කුෂානි රෝහණදීර මහත්මිය, පාර්ලිමේන්තු ගොඩනැගිල්ලේ ප්රධාන පියගැට පෙළ අසල දී ජනාධිපති අනුර කුමාර දිසානායක මහතා පිළිගැනීමට නියමිතව තිබෙනවා.
ඉන් අනතුරුව වේත්රධාරි සහ නියෝජ්ය වේත්රධාරි පෙරටු කරගත් කථානායකවරයා සහ පාර්ලිමේන්තුවේ මහලේකම්තුමිය විසින් ජනාධිපතිවරයා පාර්ලිමේන්තු මන්දිරය වෙත කැඳවාගෙන යනු ලබනවා.
අනතුරුව පැළඳුම් කාමරයට පැමිණෙන ජනාධිපතිවරයා පෙ.ව. 11.25 ට ගණපූර්ණ සීනුව නාද වන තෙක් එහි රැඳී සිට සම්ප්රදායට අනුව නියෝජ්ය වේත්රධාරී, සෙංකෝලය අතැති වේත්රධාරී, ජනාධිපතිවරයා, කථානායකවරයා සහ මහලේකම්වරු යන අනුපිළිවෙලට පෙරහරින් සභා ගර්භයට ඇතුළු වීම සිදු වනවා.
සභාගර්භයට පිවිසෙන ජනාධිපතිවරයා සභාවේ මුලසුන දරන අතර මෙම අවස්ථාවේදී කථානායකවරයා, පාර්ලිමේන්තුව කාරක සභා අවස්ථාවක දී අසුන් ගන්නා පහළ ආසනයේ ලේකම් මණ්ඩලය සමග අසුන් ගැනීම සිදු වනු ඇති.
අනතුරුව ජනාධිපතිවරයා විසින් ආණ්ඩුවේ ප්රතිපත්ති ප්රකාශය ඉදිරිපත් කරනු ලැබීමෙන් පසු සභාව කල් තැබීමට නියමිතයි.
