ශ්රී ලංකාව සහ ඉන්දියාව අතර 2018 වසරේ සිට අත්හිටුවා තිබූ ආර්ථික හා තාක්ෂණ සහයෝගිතා ගිවිසුම නැවත ආරම්භ කරමින් එහි 12 වැනි සාකච්ඡා වටය පසුගිය ඔක්තෝබර් 30 වනදා සිට නොවැම්බර් 01 වනදා දක්වා කොළඹ දී පැවැත් වුණා.
මෙරට පවතින ප්රධාන අපනයන වෙළෙඳපොළ ආරක්ෂා කර ප්රවර්ධනය කරමින් අපනයන විවිධාංගීකරණය සඳහා ආසියාවේ සහ නැගෙනහිර ආසියාවේ විශාලතම ආර්ථිකයන් සමඟ ඒකාබද්ධ වීම ශ්රී ලංකා රජයේ දැක්මයි.
මෙරට ආර්ථිකය නඟා සිටුවමින් ජනතාවගේ ජීවන තත්ත්වය ඉහළ නැංවීම සඳහා ගෝලීය වටිනාකම් දාමය හරහා ප්රධාන පාර්ශවයන් සමඟ සම්බන්ධවීම වත්මන් රජයේ අපේක්ෂාව වනවා.
ශ්රී ලංකාව සහ ඉන්දියාව අතර ආර්ථික හවුල්කාරීත්වය වෙළඳාම සහ ආයෝජන යන දෙ අංශයෙන්ම දෙරටේ ආර්ථික වර්ධනයට ඉවහල් වනවා.
ප්රමුඛතා ක්ෂේත්රවල ද්විපාර්ශ්වික වෙළෙඳාම සහ ආයෝජන පුළුල් ලෙස වැඩිදියුණු කිරීමේ අරමුණින්, 2023 ජූලි 29 වැනි දින ජනාධිපති රනිල් වික්රමසිංහගේ ඉන්දීය සංචාරයේ දී 2018 වසරේ සිට අත්හිටුවා තිබූ ETCA පිළිබඳ සාකච්ඡා නැවත ආරම්භ කිරීමට දෙරටේම රාජ්ය නායකයෝ එකඟ වුණා.
ඒ, අනුව ඉන්දියාවේ වාණිජ හා කර්මාන්ත අමාත්යාංශයේ ප්රධාන සාකච්ඡාකරු සහ වාණිජ දෙපාර්තමේන්තුවේ සම ලේකම් ශ්රී අනන්ත් ස්වරූප් මහතා ප්රමුඛ ඉන්දීය නිලධාරීන් 19 දෙනෙකුගෙන් සමන්විත දූත පිරිසක් ශ්රී ලංකාවට පැමිණ මෙම විස්තීර්ණ ගිවිසුම පිළිබඳ පුළුල් ලෙස සාකච්ඡා කළා.
විදේශ කටයුතු අමාත්යාංශය, වෙළෙඳ, වාණිජ හා ආහාර සුරක්ෂිතතා අමාත්යාංශය, කර්මාන්ත අමාත්යාංශය, වෙළෙඳ සහ ආයෝජන ප්රතිපත්ති දෙපාර්තමේන්තුව, නීතිපති දෙපාර්තමේන්තුව, වාණිජ දෙපාර්තමේන්තුව, කෘෂිකර්ම දෙපාර්තමේන්තුව, ශ්රී ලංකා මහ බැංකුව සහ ආයෝජන මණ්ඩලය නියෝජනය කරන ශ්රී ලංකා සාකච්ඡා කණ්ඩායම, ජනාධිපති ලේකම් කාර්යාලයේ ප්රධාන සාකච්ඡාකරු කේ.ජේ. වීරසිංහගේ ප්රධානත්වයෙන් යුතු ජාතික වෙළඳ සාකච්ඡා කමිටුව (NTNC), විසින් මෙම සාකච්ඡා මෙහෙයවනු ලැබුවා.
භාණ්ඩ, සේවා, මූලාරම්භයේ රීති, වෙළඳ ප්රතිකර්ම, රේගු ක්රියා පටිපාටි සහ වෙළඳ පහසුකම් සැපයීම, වෙළඳාමට ඇති තාක්ෂණික බාධා, සනීපාරක්ෂක හා ශාක සනීපාරක්ෂක පියවර, නීතිමය සහ ආයතනික කටයුතු යන අංශ සම්බන්ධයෙන් මෙම සාකච්ඡා පැවැත් වුණා.
එමෙන්ම ඉන්දු – ශ්රී ලංකා නිදහස් වෙළෙද ගිවිසුම (ISFTA) ක්රියාත්මක කිරීම හා සම්බන්ධ ගැටළු සාකච්ඡා කිරීම සඳහා විශේෂ සැසියක් ද පැවැත් වුණා.
