ශ්‍රී ලංකා ආර්ථිකය නමැති රෝගියා ශල්‍යකර්මයකින් අනතුරුව මේ වනවිට හදිසි ප්‍රතිකාර ඒකකයට ඇතුළත් කර ඇති බව ජනාධිපති රනිල් වික්‍රමසිංහ පවසනවා.
ජනාධිපතිවරයා මේ බව සඳහන් කර සිටියේ බත්තරමුල්ල වෝටර්ස් ඒජ් හෝටලයේ දී අද (17) පැවති රාජ්‍ය සේවා එක්සත් හෙද සංගමයේ “2024 හෙද සමුළුව” අමතමින්.
මේ වනවිට හදිසි ප්‍රතිකාර ඒකකයට ඇතුළත් කර සිටින ශ්‍රී ලංකා ආර්ථිකය නමැති රෝගියා සුවපත් කිරීමට තවත් වසර කිහිපයක් අවශ්‍ය වන බවයි ජනාධිපතිවරයා කියා සිටියේ.
අසාධ්‍ය තත්ත්වයේ පසු වූ රෝගියා සුවය ලබමින් සිටියදී වෛද්‍යවරයා මාරු කර සුදුසුකම් නැති වෛද්‍යවරයෙකුට භාරදීම සිදු නොකළ යුතු බවට උදාහරණ දෙමින් මෙරට ආර්ථිකය සම්බන්ධයෙන් අදහස් දක්වමින් ජනාධිපතිවරයා ප්‍රකාශ කළා.
රෝගියෙකුට ප්‍රතිකාර කිරීම ප්‍රතික්ෂේප කළ වෛද්‍යවරයෙකුගේ සහතිකය අවලංගු කළ හැකි බවත්; ආර්ථිකය සුවපත් කිරීමේ වගකීම ඉටු නොකර පලා ගිය දේශපාලනඥයන් ද ජනතාව විසින් ප්‍රතික්ෂේප කළ යුතු බව ද ජනාධිපතිවරයා මෙහිදී වැඩිවශයෙන් අවධාරණය කළා.
එමෙන්ම හෙද සේවාව මෙරට ආර්ථිකයේ ප්‍රධාන කොටසක් බවට පත් කිරීමේ වැඩපිළිවෙළ ක්‍රියාත්මක කරන බවයි ජනාධිපති රනිල් වික්‍රමසිංහ පැමිණ සිටි වෛද්‍ය ක්ෂේත්‍රයේ ප්‍රවීණයන් අමතමින් කියා සිටියේ.
