ශ්‍රී ලංකාවේ ජල ශාස්ත්‍රිය හැකියාවන් ඉහළ නැංවීම සඳහා සුවිශේෂී සන්ධිස්ථානයක් සනිටුහන් කරමින් ශ්‍රී ලංකා ජාතික ජල ශාස්ත්‍රිය කාර්යාලය සහ එක්සත් රාජධානියේ ජල ශාස්ත්‍රිය කාර්යාලය ද්විපාර්ශ්වික ගිවිසුමකට අත්සන් තැබීම සිදු කෙරුණා.
ආරක්ෂක අමාත්‍යාංශය නිවේදනය කළේ අද (14) ශ්‍රී ජයවර්ධනපුර කෝට්ටේ ආරක්ෂක අමාත්‍යාංශයේ දී මෙම ගිවිසුම අත්සන් තැබීම සිදු කෙරුණු බවයි.
මෙම ගිවිසුම තුළින් ශ්‍රී ලංකාවේ ජල ශාස්ත්‍රිය විද්‍යා ක්ෂේත්‍රයේ නිෂ්පාදන ජාත්‍යන්තර වෙළෙඳපොළට අලෙවි කිරීම තුළින් දැනුම හුවමාරු කිරීම, ධාරිතා වර්ධනය, තාක්‍ෂණික සහයෝගීතාව සහ ආදායම් උත්පාදනය ඇතුළු ජල ශාස්ත්‍රිය විද්‍යාව පිළිබඳ සහයෝගිතාව වර්ධනය කිරීම අරමුණු කරගෙන තිබෙනවා.
මෙම ගිවිසුමට එක්සත් රාජධානියේ ජල ශාස්ත්‍රීය කාර්යාලයෙහි රියර් අද්මිරාල් Angus Essenhigh සහ ශ්‍රී ලංකා ජාතික ජල ශාස්ත්‍රිය කාර්යාලයේ රියර් අද්මිරාල් කෝසල වර්ණකුලසූරිය විසින් සිය රාජ්‍යයන් වෙනුවෙන් අත්සන් කරනු ලැබුවා.
මෙම අවස්ථාවට ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා සහ අන්තර් ජාතික ජල ශාස්ත්‍රිය සංවිධානයේ සභාපති (විශ්‍රාමික) රියර් අද්මිරාල් සිසිර ජයකොඩි, (විශ්‍රාමික) ආරක්ෂක අමාත්‍යාංශයේ, විදේශ කටයුතු අමාත්‍යාංශයේ සහ ශ්‍රී ලංකා ජාතික ජල ශාස්ත්‍රිය කාර්යාලයේ නිලධාරීන් සමඟින් එක්සත් රාජධානියේ නියෝජිත නිලධාරීන් පිරිසක් සහභාගි වුණා.
සිය ශ්‍රී ලංකා සංචාරයේදී රියර් අද්මිරාල් Essenhigh, ආරක්ෂක ලේකම් එයාර් වයිස් මාර්ෂල් තුයියකොන්තා (විශ්‍රාමික) සහ නාවික හමුදාපති වයිස් අද්මිරාල් කාංචන බානගොඩ දෙරට අතර උපායමාර්ගික ජල ශාස්ත්‍රිය සහයෝගීතාව සහ ද්විපාර්ශ්වික කටයුතු ශක්තිමත් කිරීමේ අවස්ථා පිළිබඳව සාකච්ඡා කළා.
මෙම ද්විපාර්ශ්වික විධිවිධාන මගින් ජල ශාස්ත්‍රිය ක්‍ෂේත්‍රය තුළ එක්සත් රාජධානිය ශ්‍රී ලංකාවට ලබාදෙන තිරසාර සහයෝගය පිළිබිඹු කරනවා.
වර්තමානයේ ලෝකයේ ජාත්‍යන්තර සිතියම් සහ විද්‍යුත් නාවික සිතියම් ආසන්න වශයෙන් 75%ක් පමණ අලෙවි කරනු ලබන්නේ එක්සත් රාජධානියේ ජල ශාස්ත්‍රිය කාර්යාලය හරහා වන අතර, එය යටත් විජිත යුගයේ ස්ථාපිත වූ එහි සුවිශේෂී උරුමයක්.
ශ්‍රී ලංකා ජාතික ජල ශාස්ත්‍රිය කාර්යාලයට දැනට ජල ශාස්ත්‍රිය නිෂ්පාදන ගෝලීය වශයෙන් ස්වාධීනව අලෙවි කිරීමට අවශ්‍ය යටිතල පහසුකම් සහ ජාත්‍යන්තර පිළිගැනීම නොමැති බැවින්, එක්සත් රාජධානියේ ජල ශාස්ත්‍රිය කාර්යාලය මෙම වැඩපිළිවෙළ ආරම්භ කිරීමට සුදුසුම හවුල්කරුවා ලෙස හඳුනාගෙන තිබෙනවා.
