ප්‍රමුඛ පෙළේ නීති විශාරදයන්, විද්වතුන් සහ පාර්ශ්වකරුවන් එක්කර ගනිමින් “ප්‍රතිසංස්කරණ සඳහා මාවතක්: ශ්‍රී ලංකාවේ වෛරී ප්‍රකාශ නීති පිළිබඳ විමර්ශනය කිරීම” යන මැයෙන් කාලීන වැඩමුළුවක් පැවැත්වුණා.
මෙම විශේෂ වැඩමුළුව පසුගියදා (28) පැවැත්වුණේ; කොළඹ මැන්ඩරිනා හෝටල් පරිශ්‍රයේ දියි.
මාධ්‍ය නීති සංසදය (Media Law Forum) විසින් සංවිධානය කරන ලද මෙම වැඩමුළුව, වෛරී ප්‍රකාශ සමාජයෙන් තුරන් කිරීම පිළිබඳ ප්‍රතිපත්ති ප්‍රතිසංස්කරණ පිළිබඳ අර්ථවත් සංවාදයක් සහ සහයෝගීතාවක් ඇති කිරීම අරමුණු කරගනිමින් පැවැත්වුණා.
වැඩමුළුවේ ප්‍රධාන ආරාධිත අමුත්තා ලෙස, UNESCO හි නව දිල්ලි කාර්යාලයේ සන්නිවේදන සහ තොරතුරු පිළිබඳ උපදේශක, හෙසෙකියල් ඩ්ලමිනි (Hezekiel Dlamini) එක් වූ අතර ඔහු විසින් ප්‍රධාන දේශනය ද සිදු කරනු ලැබුවා.
මෙම වැඩමුළුවට ඉදිරිපත් කළ යෝජිත වෛරී කථන ප්‍රතිපත්ති ප්‍රතිසංස්කරණ ලේඛනය පිළිබඳ පුළුල් සමාලෝචනයක් ලබා දුන් බවයි වාර්තා වන්නේ.
ඵලදායී මාධ්‍ය ප්‍රතිපත්ති මුලපිරීම් හරහා වෛරී කථනයට එරෙහිව යුනෙස්කෝවේ ප්‍රයත්න ඉස්මතු කරමින් ගෝලීය අත්දැකීම් මෙහිදී බෙදාහදා ගැනුණා.
ශ්‍රී ජයවර්ධනපුර විශ්වවිද්‍යාලයේ නීති අධ්‍යයන අංශයේ ජ්‍යෙෂ්ඨ කථිකාචාර්ය සහ නීති අධ්‍යයන අංශයේ ප්‍රධානී ආචාර්ය තුසිත අබේසේකර විසින් සංසන්දනාත්මක වෛරී ප්‍රකාශන නීති සම්පාදනය පිළිබඳ විග්‍රහයක් ද මෙහිදී ඉදිරිපත් කරනු ලැබුවා.
මෙම විශේෂ වැඩමුළුව මාධ්‍ය නීති සංසදයේ සභාපති නීතිඥ විරංජන හේරත් මහතා විසින් මෙහෙයවන ලද සංවාද මණ්ඩපයක් ද සමගින් වැඩමුළුව තවත් සම්පූර්ණ වුණා.
