වෙසක් පොහොය දිනයන්හි අහංගම, හික්කඩුව, හිරිකැටිය හා මිරිස්ස යන ප්රදේශවල සිදුකළ විශේෂ සෝදිසි මෙහෙයුම්වලදි නීති විරෝධි ලෙස මත්පැන් ජාවාරමේ නිරත සැකකරුවන් 25 දෙනෙක් සමගින් රුපියල් ලක්ෂ දෙකක් වටිනා මත්පැන් තොගයක් දකුණු පලාත් සුරාබදු විශේෂ මෙහෙයුම් ඒකකයේ නිලධාරීන් අත්අඩංගුවට ගෙන තිබෙනවා.
මෙවර වෙසක් උත්සවයට සමගාමීව දිවයින පුරා සියළුම සුරාසල් 30, 31 දින වසා තැබීමට සුරාබදු කොමසාරිස් ජෙනරාල් වරයා නියෝග කොට තිබියදී මේ අයුරින් නීති විරෝධීව කටයුතු කරන ස්ථාන රැසක් පිළිබඳව තොරතුරු ලැබීමෙන් අනතුරුව වැටලීම් සිදු කෙරුණා.
ඒ අනුව වෙසක් පොහෝදින සිදු කල මෙම සෝදිසි මෙහෙයුමේදි නීති විරෝධී මත්පැන් අලෙවි කිරිමට සුදානම් කරමින් සිටි සැකකරුවන් 8 දෙනෙක්ද, බලපත්ර නොමැතිව රජයේ අරක්කු විකුණු ආපනශාලා 17 කොටුකර ගැනීමට හැකිවි තිබෙනවා.
සැකකරුවන් 25 දෙනාට සුරාබදු ඇපමත මුදාහැර ඇති අතර ඉදිරියේදි මාතර, ගාල්ල හා බලපිටිය යන මහේස්ත්රාත් අධිකරණ වෙත ඉදිරිපත් කිරීමට නියමිතයි.
සම්බුදු තෙමගුල් වෙසක් කළාපයක් මුවාවෙන් මාතර හිරිකැටිය සංචාරක කළාපයේ වෙරළාසන්න ආපනශාලාවක තරුණ තරුණියන් පිරිසක් සහභාගී වූ සමාජ සාදයක් වටලා එහි මත්පැන් අලෙවි කරමින් සිටි 40 හැවිරිදි කළමනාකරු විදේශීය රටක නිෂ්පාදනය කළ මත්පැන් තොගයක්ද අත්අඩංගුවට ගෙන තිබෙනවා.
