විශේෂඥ වෛද්‍යවරුන්ගේ සංගමය විසින් නිකුත් කරන ලද මාධ්‍ය නිවේදනයක් මෙහි දැක්වෙයි.
මාධ්‍ය නිවේදනය
විශේෂඥ වෛද්‍යවරුන්ගේ සංගමය විසින් මහජනතාවට කරන කාරුණික දැනුම් දීමයි.
දිනෙන් දින පහතට වැටෙන මෙරට ආර්ථිකය හමුවේ රජය මුහුණ පා ඇති අධික මූල්‍ය අර්බුදය නිසා රටවැසියන්ගේ මූලික අවශ්‍යතාවයන් සපිරීමට පවා රජය අසමත් වී ඇත.
මෙම තත්ත්වය රාජ්‍ය සෞඛ්‍ය සේවය මගින් මහජනයාගේ මූලික සෞඛ්‍ය අවශ්‍යතා සැපයීමටද ඉතා දැඩි බලපෑම් එල්ල කර ඇත.
මේ නිසා රාජ්‍ය සෞඛ්‍ය සේවයට බලපා ඇති අවදානම අප දකින්නේ පහත සඳහන් අයුරිනි.
- සාමාන්‍ය රෝගීන්ට අත්‍යවශ්‍ය ඖෂධ මෙන්ම ඉතා හදිසි ජීවිත අවදානම් හමුවේ භාවිතයට අවශ්‍ය ඖෂධ මෙන්ම වෛද්‍ය උපකරණ වල දැඩි හිඟය මේ දිනවල රජයේ රෝහල්වල ට දැඩි බලපෑමක් සිදුකර ඇත.
- ඉන්ධන හිඟය නිසා දැනට ඉතා අපහසු තත්වයන් යටතේ පවත්වා ගෙන යන සෞඛ්‍ය සේවා පවා සැපයීමට සෞඛ්‍ය සේවකයින්ට රෝහලට පැමිණීමද ඉතා අපහසු වී ඇත.
එම නිසා විශේෂඥ වෛද්‍යවරුන් ලෙස අප විසින් යම් අවස්ථාවලදී රෝගීන් සඳහා සිදුකරන සේවාවන් කාර්යක්ෂම ව සැපයීමට අපට නොහැකි තත්ත්වයක් උදා විය හැකි බවත් මෙය අපට පාලනය කළ නොහැකි තත්වයන් යටතේ සිදුවන නිසා මේ පිළිබඳව මහජනතාව දැනුවත් කිරීම අපගේ යුතුකමක් ලෙස අපි දකිමු.
එම නිසා අප මහ ජනතාවගෙන් කාරුණිකව ඉල්ලා සිටින්නේ මෙවැනි දුෂ්කර අවස්ථා සිදුවුවහොත් එවැනි අවස්ථාවලදී දැඩි සංයමයකින් කටයුතු කර අනවශ්‍ය ගැටුම් ඇතිවීම අවම කර ගැනීමට කටයුතු කරන ලෙසය.
මෙම තත්ත්වය පිළිබඳව, දැනටමත් ආර්ථික අර්බුදය නිසා පීඩාවට පත්ව ඇති මහජනතාවට අප අපගේ කනගාටුව ප්‍රකාශ කරන අතර හැකි සෑම අවස්ථාවකදීම අපගේ සේවය සැපයීමට අපි බලාපොරොත්තු වෙමු.
විශේෂඥ වෛද්‍යවරුන්ගේ සංගමය
