2018 වසරේ දී කිරිඳිවැල ප්‍රදේශයේ පදිංචිව සිටි විශ්‍රාමික යුද හමුදා සෙබළෙකු පැහැරගෙන ගොස් අතුරුදන් කළ බව කියන සිද්ධියක් සම්බන්ධයෙන් සැකකරුවෙකු අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබෙනවා.
අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශයේ මඟින් සිදුකළ විමර්ශනවලට අදාළව අදාළ සැකකරු ඊයේ (08) නිට්ටඹුව, රණ්පොකුණුගම ප්‍රදේශයේ දී අත්අඩංගුවට ගෙන ඇති බවයි වාර්තා වුණේ.
අත්අඩංගුවට ගැනුණු සැකකරු අවුරුදු 47ක් වන රණ්පොකුණුගම, නිට්ටඹුව ප්‍රදේශයේ පදිංචිකරුවෙක්.
සැකකරු සන්තකයේ තිබී විදෙස් රටක නිෂ්පාදිත පෑනක හැඩයෙන් යුත් කුඩා ගිනි අවියක් එයට යෙදන පතරොම් 05 ක්, ටී-56 පතරොම් 04 ක්, මිලිමීටර් 09 වර්ගයේ පතරොම් 08ක් සහ බෝර 12 වර්ගයේ පතරොම් 02ක් විමර්ශන නිලධාරීන් විසින් සොයාගෙන තිබෙනවා.
කිරිඳිවැල, නාරංගස්පිටිය ප්‍රදේශයේ පදිංචිව සිටි විශ්‍රාමික යුධ හමුදා සෙබළෙක් 2018.09.09 දින පැහැරගෙන ගොස් අතුරුදන් කිරීම සම්බන්ධයෙන් සැකකරුට එරෙහිව චෝදනා එල්ල වී තිබෙනවා.
