අද පස්වරු 6.30 සිට රාත්‍රි 8.30 දක්වා කාලය තුළ පැයක පමණ විදුලිය කප්පාදුවක් සිදුකිරීමට බොහෝ දුරට ඉඩ ඇතැයි ලංකා විදුලිබල මණ්ඩලය නිවේදනය කර තිබේ.
එම මණ්ඩලය පවසන්නේ නොරොච්චෝලේ බලාගාරයේ 03 වන විදුලි ජනන යන්ත්‍රය තාක්ෂණික දෝෂයක් හේතුවෙන් අද යළි අක්‍රිය වීමත් සමග මතුවන මෙගාවොට් 150කට ආසන්න විදුලි හිඟය නිසා මෙම කප්පාදුව කිරීමට සිදුවන බවය.
අද රාත්‍රියේ ජාතික විදුලි ඉල්ලුම ඊයේ දිනයේ මෙන්ම මෙගාවොට් 700 ඉක්මවා ඉහළ ගියහොත් මෙම තත්ත්වය ඇතිවිය හැකිය.
හැකිතාත් විදුලි පරිභෝජනය අවම කර ජාතික විදුලි ඉල්ලුම අඩු කරගැනීමට සහාය වන්නැයිද එම මණ්ඩලය ජනතාවගෙන් ඉල්ලා සිටිනවා.
මෙගාවොට් 2708ක් වූ ඊයේ රාත්‍රී ජාතික විදුලි ඉල්ලුමෙන් සියයට 70ක් (මෙගාවොට් 1896) තාප විදුලි බලාගාරවලිනුත්, සියයට 27 ක් (මෙගාවොට් 731) ජල විදුලි බලාගාරවලිනුත් සහ සියයට 3ක් (මෙගාවොට් 81) සුළං,සූර්ය බලය හා ජෛව ස්කන්ධ යන පුනර්ජනනීය බලශක්ති ප්‍රභවයන්ගෙනුත් සම්පූර්ණ කරගැනුනි.
ජල විදුලිබලාගාර සඳහා ප්‍රධාන වශයෙන් ජලය සපයන කාසල්රි හා මාවුස්සාකැලේ ජලාශවල ජලමට්ටම් තවදුරටත් පහත බසිමින් පවතිනවා.
එම ජලාශ ආශ්‍රිතව පසුගිය දින කිහිපයේ කිසිදු වර්ෂාපතනයක් වාර්තා වී නැහැ.
ජල මට්ටම පහත බැසීම නිසා කාසල්රි හා මාවුස්සාකැලේ ජලාශවල යට වී තිබූ නටබුන් පවා මේ වනවිට මතුවෙමින් පවතිනවා.
විදුලිය කප්පාදුවක් සිදුකිරීමට අවසර ලබානොදුන් බව මහජන උපයෝගිතා කොමිසම සඳහන් කළද අද දහවල් කාලයේ සිටම දිවයිනේ ප්‍රදේශ රැසකින් විදුලිය විසන්ධි වීම් වාර්තා වුණි.
