ඩුබායි රාජ්‍යයේ සැඟව සිටිමින් මෙරට මත්ද්‍රව්‍ය ජාලය සහ අපරාධ රැල්ල මෙහෙයවන සංවිධානාත්මක අපරාධකරුවෙකු වන වැලිඔය ප්‍රියන්තගේ ගෝලයින් දෙදෙනෙක් විශේෂ කාර්ය බලකාය විසින් අත්අඩංගුවට ගෙන තිබෙනවා.
මෙහිදී ඔවුන් සන්තකයේ තිබී T56 වර්ගයේ ගිනි අවියක්, විදේශීය නිෂ්පාදිත රිවෝල්වරයක්, ජීව උණ්ඩ, හෙරොයින් සහ අයිස් මත්ද්‍රව්‍ය ද සොයාගෙන ඇති බවයි වාර්තා වුණේ.
මෙම සැකකරුවන් දෙදෙනා පදවිය, බෝගහවැව ප්‍රදේශයේ දී පෙරේදා (05) රාත්‍රියේ නිවසක සිටි 73 හැවිරිදි කාන්තාවක් වෙඩිතබා ඝාතනය කිරීමට සම්බන්ධ බවයි තොරතුරු වාර්තා වන්නේ.
මොවුන් සන්තකයේ තිබී සොයාගත් T56 වර්ගයේ ගිනි අවිය එම අපරාධය සඳහා යොදාගත් අවිය බවයි හෙළිව ඇත්තේ.
කෙසේ වෙතත් සැකකරුවන් දෙදෙනාගේ ඉලක්කය වී ඇත්තේ ඝාතනයට ලක් වූ 73 හැවිරිදි කාන්තාවගේ මිණිබිරිය බවට තොරතුරු අනාවරණය වී තිබෙනවා.
එම තැනැත්තිය මත්ද්‍රව්‍ය ජාවාරමකට සම්බන්ධ බවයි වාර්තා වන්නේ.
කෙසේ වෙතත් අදාළ 73 හැවිරිදි කාන්තාව ඝාතනය කිරීම වැරදීමකින් සිදු වූවක් බවට කරුණු අනාවරණය වී තිබෙනවා.
