පුද්ගලයින් රවටා වංචනිකව බැංකු ගිණුම් වෙත මුදල් තැන්පත් කරවා ගැනීමට සම්බන්ධ සැකකරුවන් දෙදෙනෙකු ගිරාඳුරුකෝට්ටේ ප්‍රදේශයේදී පොලිස් අත්අඩංගුවට ගෙන තිබෙනවා.
මිල්ලත්තෑව සහ සුවශක්තිපුර ප්‍රදේශවලදී ඊයේ සවස මෙම සැකකරුවන් දෙදෙනා අත්අඩංගුවට ගෙන තිබුණේ අපරාධයක් සිදු කිරීමේ සිද්ධියකට සම්බන්ධවයි.
අවුරුදු 25 සහ 37 වයස්වල පසුවන සැකකරුවන් දෙදෙනාගෙන් වැඩිදුරටත් කළ ප්‍රශ්න කිරීම්වලදී මෙම මුදල් වංචාව සම්බන්ධයෙන් අනාවරණ වී තිබෙනවා.
ගුරුවරයෙකු ලෙසට පෙනී සිටිමින් ගම්පහ ජාඇල කඳාන පමුණුගම වීරගුල පූගොඩ සහ පේරාදෙණිය පොලිස් වසම්වල පාසල් ළමයින්ගේ දෙමව්පියන්ගෙන් මෙලෙස මුදල් වංචා කර ඇතැයි සඳහන්.
ගුරුවරයෙකු ලෙසට පෙනී සිටිමන් ළමයින්ගේ දෙමව්පියන්ට දුරකථන ඇමතුම් ලබාදී ඔවුන්ගේ දරුවන් අසනීප වී රෝහල් ගතකර ඇති බැවින් හදිසි ප්‍රතිකාර සඳහා මුදල් අවශ්‍ය බවට පවසා බැංකු ගිණුම් අංක ලබාදී එම ගිණුම් වෙත මුදල් බැර කරවාගෙන තිබෙනවා.
මේ ආකාරයට සැකකරුවන් දෙදෙනා රුපියල් ලක්ෂ 25ක් පමණ වංචා කර ඇති බවටයි පොලිසිය හෙළි කරගෙන ඇත්තේ.
ගිරාඳුරුකෝට්ටේ පොලිසිය මේ සම්බන්ධයෙන් වැඩිදුර විමර්ශන සිදු කරනවා.
ව්‍යාජ දුරකතන ඇමතුම් ලබාදී පුද්ගලයින් රවටා මෙලෙස බැංකු ගිණුම් වෙත මුදල් තැන්පත් කර ගන්නා වංචනික පුද්ගලයින්ට හසු නොවන ලෙසට මීට පෙර ද පොලිසිය මහජනතාව දැනුවත් කර තිබෙනවා.
පොලිසිය ජනතාවගෙන් තවදුරටත් ඉල්ලා සිටින්නේ මෙවැනි වංචනික පුද්ගලයන්ට හසු නොවන ලෙසටයි.
